جـناح و رقبة
بـ قلم أسـمـاء الـبـيـطـار
لما كنا صُغيرين كان عند جدتي في البيت الكبير سطح فيه خيرات ربنا من جميع أنواع الطيور اللي تخطر على بالك
كانت ديماً تقول تلم حسنة البيت يعني بواقي الأكل و تنضيف الخضار اللي بنجيبه من السوق يعني البيت ما كنش بيطلع منه أكل يترمي ابدا و كان الخير مالي الدُنيا ..
تعالى بقى لما نييجي ندبح الطيور دي و نعمل وجبه محترمه و شوف الخناق اللي بيبقى على
الراس و الجناح و الرقبة و الكبد و القوانص و الرجول و دي قصة لوحدها و هنرجع لها تاني .
آه و الله كان خناق و كل واحد لازم يدوق منهم من جمال طعمهم
و حاجة مختلفه عن باقي لحم الطيور .
و لما سافرت بره لاقيت منظر الطيور غريب جداً منزوع منها كل حاجة حتى الجلد و طبعاً علشان الواحد ما كنش واخد على الحاجة المفرزه
بقيت اضطر اجبها لكن الواحد بياكلها من غير نفس .
و طبعاً كل بلد ليها عاداتها لكن إحنا عاداتنا لا يُعلي عليها .
و راحت الأيام و جت الأيام و شوية شوية طلع علينا مكن تنضيف الفراخ و طبعاً محلات و كل حاجة في المحل ده بتتباع زي البيت اللي ماكنش بيترمي منه حاجة بس الفرق كبير جداً .
إنه بقى يكرهك في نعمة ربنا مش علشان هي وحشه أو مش مفيده لحضرتك و لكن علشان هو هيستفاد منها و هيبعها بمبلغ تاني
و بدء حاجة في حاجة .
حضرتك محتاجة الرجول و قدام الناس فـ الست تتكسف !
و تقوله لا شكرًا !!
المره اللي بعدها عوزه الراس ؟
لا شكراً !
بس ما قدروش على الجناح لأنه جزء من الطير .
فطلعوا إنه مليان هرمونات و سموم و و و
لحد ما كرهوا الغلابة في عيشتهم ؟؟!!
الغلابة اللي ممكن تكون الوجبه الرئيسية لهم جوانح الفراخ دي
بيعملوا عليها وجبة كامله للولاد من نفسهم إذا كانت الحالة ما تسمحش أو الشهر طويل فلازم يفرجوا على نفسهم .
كنت واقفة مره بشتري فراخ لقيت ست على أد حالها بتكلمني بصوت واطي منعاً للأحراج .
بتشاورلي على الأجنحة و بتقولي بكام ؟
قولتها بكذا فلقت اللي معاها ما يكفيش .
فبسرعة قولتها أنتم كام فرد ؟
قالتلي إحنا أربعة ؟
قولت لصاحب المحل هات كيس .
قولتها نقي أربعة على قدكم .
قالتلي ينفع قولتها طبعاً .
نقت اللي عوزاه .
و خدتهم منها و قولتله زي ما يطلعوا .
المهم طلعوا بمبلغ بسيط جداً بقت الست مبسوطة
قولتلها ما تتكسفيش من حاجة خُدي على ادك اي حاجة تحتاجيها كلنا بنعمل كده .
الست ريحت شويه و قالتلي قوليلي طريقة حلوة بقى اغير للولاد بيها المهم قولت لها طريقة جميلة و كمان هتطلع شوية شوربة .
لو عوزين الطريقة بقى نبقى نقولها بعدين .
المهم الست كانت فرحانه جدا .
إنما المحلات تعمل رز بالخطة و كبد و قوانص الفراخ !!
ياسلام على الطعم مع إن الكبد ده مركز السموم في أي حي !
نروح محلات مفتخره و نطلب شوربة بكبد الوز !!
طبعاً ناس بنفهم في الأكل و معانا ندفع و يغلوا علينا
محلات بتعمل أجنحة الدجاج على الطريقة الصينية !!
يا خبر ايه الجمال ده .
نرجع بقى لأرجل الدجاج
أنتشرت الفترة الأخيرة على مواقع التواصل الأجتماعي تعليقات ساخرة على صورة النجم البرتغالي “كريستيانو رونالدو” وهو بياكل أرجل الفراخ
و قبل ما تتريقوا أعرفوا هو بياكلها ليه
لأنها بتحتوى ع مادة اسمها كولاجين المادة دى مفيدة لنضارة البشرة وبتأخر علامات الشيخوخة
بتحتوى ع نسبة عالية من الحديد فبتقلل الأنيميا وكمان بتزود عدد خلايا الدم الحمرا
تحتوى ع البروتين اللي هو مهم جداً للرياضيين علشان بيزود بناء العضلات والأنسجة
بتزود كفاءة جهاز المناعة وبالتالي بتقلل معدل الأصابة ببعض الأمراض
الغضروف اللي جواها مفيد جداً لصحة المفاصل ، ويُفضل سلقها وتناول شوربتها لمرضي المفاصل
كمان في ابحاث أثبتت انها بتجدد الخلايا العصبية والأنسجة وبتحافظ على صحة الأوتار .
و دي طبعاً دراسات علميه كنا إحنا بفطرتنا بنعملها دون سابق اي معرفة .
و تأكيد للكلام ده .
كان في واحده بتجيب لماما زبدة فقعدت الست دي فترة ما تبنش
المهم قابلتها عند بتاع الفراخ بتشتري منه رجول فقط لا غير .
و قالت لماما إن دكتور العظام وصفها لها لأن فيها فوايد كتير جداً للعضم .
الخُلاصة ..
ما تسودوش على الناس عيشتها في ناس عايشه على أبسط حاجة ممكن تتخيلوها .
و اللي أنت مش بتحبوا في ناس تانيه روحها فيها
كل حاجة ربنا خلقها ليها فايدة معينه و دي انا على يقين منها .
دُمتم بسطاء ..
التعليقات مغلقة.