جواكِ شراع مكسور قلم تهاني بركات
جواكِ شراع مكسور….
ايه رأيك في تمثيلي
و حضوري و جماهيري
رسمت الضحكة على وشي
و قلت خلاص ما يفرقشي
بعادك عني شيء عادي
و جرحي أوام هيتداوى
هاعيش و أفرح و هنساني
و الدنيا يا سيدي دوارة
أنا جوايا بسألني
بعد البعد ما وجعني
أنا أستاهل تِجَرحني ؟!
هأقيد شمعي على جرحي
و هأكمل دوري و تمثيلي
صحيح ما بقتش مهتمة
و امبارح صبح بكره
و جوه القلب فيه ذكرى
مرارها بيقولي كدا كفاية
ايه في الدنيا يستاهل
نبكي عليه و نتنازل
ناح الحمام بعيد عني
و هجر عشي و حيرني
و بعد البعد راجعلي
و بيقولي سامحيني
فكرت الهنا في بعدي
و غيابي هينصفني
هاشوف الضعف في عنيكي
آتاري البعد جَرّحني
و مع غيرك لقيت حتفي
و جناحي صبح مبتور
سامحيني أنا المغرور
و بغروري بنيت السور
أنا شايفك بقلب جسور
و جواكِ شراع مكسور
الكل صدق تمثيلك
و أنا وحدي شايف عينك
عنيكي ملاك ما تكدبشي
و بتقولي ما تبعدشي
أنا في بُعدك نسيت نفسي
التعليقات مغلقة.