جوه خيالي….. تهاني بركات
حد يقولي و يفهمني
طيفك ليه عمال يشاغلني
أسيبه و أهرب بين حكاياتي
ألاقيه بين حروفي ينادي
أعمل نفسي مش سمعاه
و أغمض عيني و أقول هنساه
يجي في بالي يقولي تعالي
عيشي معايا جوه خيالي
مع قهوتنا و صوت غنوتنا
أنسى حبيبتي مرار غربتنا
غربة تاهت فيها أرواحنا
و نسينا نحقق فيها أحلامنا
عشنا سنين أو يمكن متنا
زي الساقية لفينا و دورنا
و فجأة لقينا أحلى سنينا
شابت و احنا معاها بتجرحنا
في لحظة لقتني وقفة هناك
لسه ما بينا كلام و ميعاد
تفاصيل لسه عايشة معاك
روحي ساكنة جوه حكاية
رافضة تكتب ليها نهاية
روحي ساكنة جوه كتاب
كل حروفه مش نسياك
٣٠ / ٧ /
٢٠٢٢
التعليقات مغلقة.