حاولت أنساك نسيت أنسى

حاولت أنساك نسيت أنسى

عبدالخالق شويــــــــــــــــــــل

حاولت انساك
…………….
حاولت انساك نسيت انسى
ومُش هنسى
بتعرف ليه!!
لأني معاك لقيت نفسي
اللي كات
ضايعة
وياما كتير نكشت ف كل
أركاني
عشان القاك
وياما سهِرت استنى واتمنى
ف يوم أهواك
وقررت أنشغل عني واتوه مني
وافضالك
واجري وراك
بتعرف ليه!!!
ماتسألنيش وشوف قلبك
جرى له ايه!!!
وشوف راح فين
اقولك فين!!
خُلاصة القول
مع النسمة اللي كات دايما
تحوم حولك
وايه قولك
ف قلب انساب ف شُريانك
وحبل وريد
وبالتحديد
فرض سلطان قوي جُواك
وعاش لهواك
وحد حدود
وفيها جنود
من الأشواق وسيف مسلول من الغيرة
مكان م تروح
عشان يحميك
من الهمسة من اللمسة ومن نظرة
عذول
خمسة في عين حساد
ومِن طير
يحُط في يوم على كتف الهوى
مُغرم
يكون مقسوم
ومِش مقسوم
وغيرة الحُب نار قايدة
حاولت كتير
أطفيها
ويوم عن يوم تملي تزيد
ومش بحسب
حساب للغير
وليه احسب ماهو انت الشوق
نثرته بإيدك
الحانية على أرضي اللي كانت بور
ففجرت
الهوى بُركان
من الحُب اللي كان مخلوق
وشُفتك في
سما شِعري
حروف عايقة بتوب أبيض
على جناح
النسيم طايرة وريحة المِسك
والعنبر
مع الأنفاس
ولون الورد ف خدود الهوى
حرفين
خجل وحياء
ماتتصورش
من غيرك حنيني كان هيبقى
لمين!!
وهوَّا كان ف قلبي حنين
لغيرك يوم!!
وكبل القلب كان فاصل عن
الأشواق
مفيش تيار
وفجأة لقيته قام يعزف على صوت
اللُقا ألحـــان
لوِّش الصُبح
سابق ضحكة
الكروان
وقال للحُزن سلـِّم لي على دمعي
اللي كان ياما كان
,,,,,,,,,,,,,,,,,,,,,,,,,,