حبات العمر
بقلم ياسر بسيوني
حضن الشمس يدوبه ساعات
وكنت أنا فيه لكنه ما يكفّي
حضنك وهو بعيد كتير أوقات
بحس أنا بيه بيملاني وبيدفّي
خيوط الشمس مش دايمة
لكن سحر ايديكي واللمسات
بتلملم جروح القلب وبتشفي
عنيكي دي نور ونار لو نايمة
وآه من دوبي لو تكون نظرات
بحور الكون نار شوقي ما تطفي
صراخ الطفل دا يدوب أنات
وصراخي أنا دايم ومتخفّي
عيون الناس بتبصلي وهايمة
بيلوموني على الضحكة
وبيحسدوني علي البسمات
وآه من شوقي للفرحة
وآه من حنيني ولهفي
وآه من أوردة صايمة
دي ياما قلوب صاحبها مات
وماشي بين الخلق متشفّي
متفكك الأوصال لو تبان قايمة
وعقد العمر متلصم يدوب حبات
محاوطه ، ومكتفه بكفّي
وأيامي تلاقيها في دمعتي عايمة
لو جربتم حرقة الآهات
ما بين حزني وبين أسفي
وبين نفسي لما تكون لايمة
وكلامي اللي مخلوط بسكات
وحمل جبال على كتفي
وروحي اللي متشققة
بتتمنى سما غايمة
تستغربوا إزاي عايش ومتحمل
وقادر برغم دا كله اني أكمل
وقادر أضحك وأتبسم
زي صوت البلابل لما تتجمّل
ولحن الناي لما بيقسّم
يا دنيا ليه الظلم بقا مسافات
والعدل فيكي حكاوي من زمن فات
والقسوة على الوشوش بتترسّم
يا عيون من همها ما بتنام
ويا حبات العمر باقي منك كام
تعبنا خلاص من العد والأرقام
ويا قلوب ….
ولا خلاص معدش فينا قلوب
والكل يا خسارة بقا مغلوب
على أمره ساعة اللقا وكمان
وقت الفراق كلنا بندوب
يا تري مين سرسب الكلمات
او مين داس على زناد حرفي
وهتقوم للعقل قومة .. جايز
ويمكن ماهيش قايمة
مجنون وماشي بالاشارات
وماسك في الايدين خُفّي
بدوس علي الصبر يمكن
ألاقي نور النهاية
بعد كل دي الضلمة
التعليقات مغلقة.