حبة وجع
بقلم الفلاح الفصيح
معوض حلمي منشأة بطاش تمي الأمديد دقهلية
حبة وجع باقيين
في آخر حته م الإحساس
لا قالوا الوداع ماشيين
ولا رضيوا يتاخروا
دخلت سوق الفرح باير ليه
وفريحه سوق الهم على آخره
جابولي الضغط والكافيه
الضحكه طالعه بعافية العافيه
وسيدنا الولي جمعنا في الساحه
شدوا الحزام شدينوا ماتحلش
فكوا الحزام والبطن فضاحه
عصافيرها نواحه تنده وماتكلش
مقطوع ياخط السير
وكل خطوه مطب
وان قلنا ده تقصير
هانعيش في هم وكرب
واهي ماشيه بينا الدنيا على كيفها
مربوط إيدينا عيونا على سيفها
حتى اللسان اتسجن صابه الخرس
ممنوع بأمر الحرس ينطق ويوصفها
وان يوم نطق / وساق جنانه
هايقولوا دبور وزن
سلم ودانه / للي خانه
وعقرب الساعه رن / آن أوانه
جاي القدر بالمختصر
حكمك صدر م المحكمه
والمشنقه متعلقه
هتموت بلاش
وانت اللي ميت / ميت
فمش هتفرق مات ولا عاش
وانت اللي عايش ع الكفاف
قاعد تعد سنين عجاف
واللقمه فيها تأكلها حاف
وبردها زاد ع اللحاف
ليه تخاف ياتعيش جدع
ياتموت جدع
م انت اللي صدقت الودع
ورضيت بكيفك تنخدع
وسيبت حقك راح فاشوش
وانت ف زمان المكر فيه
مالي الوشوش
والكدب فيه سم زعاف
مالي اللسان
وفيه بشر مبيرحموش
لو طالوا لحمك ينهشوك
زي الوحوش زي الحيتان
خايف تموت والموت أمان
وانت الضعيف
في زمان جبان
صدقني موت
دا الموت أمان
صدقني موت / دا الموت آمان
التعليقات مغلقة.