حبر السنين …بقلم شيماء عادل
طرطش بواقي لهفتي بوداع
خبي الحكاية جوه غصن حمام
سرسبها حبة باللقا الموجوع
وبحضن بارد يشبه الموت
ودموع بتعصي أوامر الصبر
لحظة ما يطلب منها تتخفي
وايدين ترد سلام علي المكتوب
لحظة ما بتفضفض وجع
ترسم طريقك حبر كله حنان
ونظرة من السكات تحضن حنين دايم
تْهَدي القلب علي العصيان
وتاخد عهد بالتوبه
تفرش قلبها ببراح
مساكن بعد طول غيبة
تداري الفرحة بعيون السكات فدادين
تسلم ع الليالي بشوق
ترد أنت البراح بفراغ
تسيب الجرح يفرش علي الليالي بكاه
ترسم طريق القسوة من غير قلب
ترمي الوجع فدادين
تحصد فراق
عمرك في يوم ما تلين
تحدفني فرقة سنين
حتي الوعود منك مالقيتلهاش مواعيد
كداب بتوعد والليالي تمل
وان ضَل قلبي في الطريق بيحن
لسلام عيونك من بعيد لبعيد
بستني تفرش فرحتي بمواعيد
تعيد حياتنا للبراح خطوات
ارجع اسلم عمري للمكتوب
التعليقات مغلقة.