حبيبى ملاك كلمات / صفوت راتب
وشاغلنى هواك ياللّى
مليت القلب والإحساس
مانا عاشق .. ومن حقّى
عشان ليَّه حبيب واحد
بكلّ الناس
فى قلبه بحر حنيَّه،
على شطوطه أمانيّه
حبيبى ف قلبه شايلنى
وروحه الحلوه حضنانى
واحساسه اللى خلَّانى
ملكت الدنيا والفرحه
ف نظرة عينه طرَّاحه
على حدود اللقا خطاويه
براح فاتح على واحه
على مدّ البصر شوفها
ربيعها زهور بألوانها
عبير أنسام بينعشها
يطير بيّا على عالم
من الأحلام ميوصفشى
طيور صفّين .. بتتقابل
هواها تعزفه ألحان
ونبض القلب أوتارها
حبيب واحد ..
من الوحده أخد قلبى
وروحى من أسى الغربه
لحبّ بجدّ ربّانى
وداق القلب من إيده
حلاوة شهد عناقيده
مسح بحنان على جروحى
وفى سكوتى سمع بوحى
ولمَّا روحى أوجاعها تبكّيها
تطبطب روحه على روحى
ف كل أوان
وآن الوقت أعلنها
…. ف دنيا منها بنقاسى
حبيبى مركبى وشطِّى
ونخله اهزّها تحدف
فى إحساسى .. دفا وإيمان
بإنّه الفكره والمضمون
وإنّه مُجمل المعنى
وأحلى وأجمل التفاصيل
ندى فى الفجر بيصبّح
بميت قُبله على الأغصان
ونيل خلا خريفى ربيع
حبيبى ملاك ..
فى أجمل صوره للإنسان
التعليقات مغلقة.