حب شباب سن الستين …
جمال زكي عينر
بت جميلة وحلوة شوية
راوشاني في الراحة والجايه
عمري صحيح انا عدى وفات
بس اللي يقرب ويشوفني
يقول تلميذ لسه ف ثانويه
طول مانا قاعد كده في الحارة
اقلع والبس في النضارة
اقول دلوقتي الحلوة تعدي
يمكن المح منها اشارة
عدت هدت مني الخطوة
قاعد جنبي الملعون عطوه
وده راجل زي المنشار
بيذيع ولا نشرة اخبار
لو شاف ان عينيكي عليه
حيشردني ف اول هفوه
اوعي يا بت تضيعي هيبتي
تتفشخري وتجيبي ف سيرتي
ده انا دوخت بنات الحارة
ولا واحدة ف يوم قلت قيمتي
سيبك من شبان الايام دي
دي عيال لا تجيب ولا بتودي
دي عيال تعبانة وفقرانه
الخير والعز كتير عندي
حاراعيكي واشيلك في عينيه
ومعاكي هعيش عيشه هنيه
نتفسح ونلف الدنيا
وهجيب لك اجدع عربيه
راح اوريكي غرام وحنين
ولا عاد دمع يسيل م العين
وهخليكي تقولي للدنيا
اجمل حب انا شفته يا دنيا
حب شباب سن الستين
بقلمي الشاعر جمال زكي عينر
التعليقات مغلقة.