حدد اقامتي بقلم / تهاني بركات
لك في قلبي كام حكاية
رافضة تبقى دي النهاية
يعني ايه ماضي و مات
مدفون في خانة الذكريات
أنا لسه باخبي فيك نفسي
و حكايتي لسه ما قلتهاش
و بلملم من الحروف اسمي
لسه النقط ما رسمتهاش
بين الضلوع هنا ملعبي
روحي لسه ما وأدتهاش
الحكم ليه أوام صدر
و القرب منك أصبح خطر
حتى التراب فوق الصور
ممنوع بشدة من الكلام
مين اللي قال و مين حكم ؟؟
أنا ويا روحك جوه رسمك
شكلي مرسوم من ملامحك
عاند نفسك….
و انفيني بره السطور
حدد اقامتي و ارسم نهايتي
امنع طيفي من الظهور
ارسم كمان فوق الورق
مركب غرق بين الطرق
لما حاول يوصلك
اكتب في قايمة الممنوعات
ممنوع طيفي يروح لها
أو ينطق لساني اسمها
و كام خط أحمر
تحت كلمة ما بنسهاش
أوئد حكايتي
جوه خانة الذكريات
التعليقات مغلقة.