حد عارف يعنى ايه أم ماتت ؟!… بقلم هناسعد
حد عارف يعنى ايه أم ماتت ؟!
يعنى ضحكة العمر الجميلة خلاص راحت
يعنى جسم لسه عايش لكن روحه حقيقي فاضت
يعنى بنيان اتهدم والجبال الراسية مالت
يعنى قلب بات وحيد والوحوش الكاسرة هاجت
أم ماتت
يعنى غربة جوة قلبك بعد ما اتحرم الونس
يعنى شاف بعد البراءة فى عينيهم دنس
قلب اتوجع قلب اتصدع وقلب انهدس
الام كانت لكيانك حرس
أم ماتت
يعنى قلب كان محاوطك من كل ناحية
يعنى كنت تنام وتحلم … وهى صاحية
يعنى دعا فى جوف الليل يصونك
وطبطبة وعيشة دافية
لما ماتت مشيت على الشوك برجل حافية
حد جرب أمه ماتت وهو عاش؟!
الحقيقية دى حاجة لسه مشوفناهاش
اللى ماتت أمه حاله غم
عايش ليل نهار في هم
صاحي بيدور عليها
ولما نام
كان أمله يشوف عينيها
ولو فى حلم
أم ماتت يعنى بعلو صوتها الدنيا قالت
ضاق براحي والقلوب الخضرة شابت
تاه طريق كنت راسمه والآمال جوايا تاهت
نفس هانت
ونفس خافت
ونفس خابت
والهموم جواها زادت
أم ماتت
كنت اتمنى يقولوا عن تعبها وعكة زالت
وان كل أم ف الدنيا عاشت
التعليقات مغلقة.