حضن بألف معنى
جيجى حافظ
حكاياواحة57
تسألني عن الحب ؟
الحب لغة _من يدركها هنأت حياته.
فليس كل الحب حبا…. ….. ….وليس كل الاهتمام اهتماما
احيانا نحب أشخاص لدرجة الجنون لكن لافتقادنا لفنون الحب ولغته نخسر قربهم منا
الحب شعور لا ارادى ولكنه مزاجى يتغير ويتقلب حسب الأهواء الااااااا حب الاب والام مهما طالت بينا السنين هيفضل اجمل نعمة فى حياتنا.
كل حب وانتو قريبين من بعض
حضن بألف معنىحكايتى المرة دى تتلخص فى مشهد بنوتة غاية فى الدلع والرقة عندها حوالى 6سنين كان عندها التهاب خلف الأذن باباها ومامتها داخو بيها على الدكاترة(اكتر من 4 دكاترة) وكل دكتور يكتب مضاد حيوي (والبنت تأخذ المضاد ومفيش حاجة بتتغير)..لحد ما الام بدأت تتوجه إلى ربها بالدعاء وفجأة جه على بالها انها تعمل أشعة (لكى تتضح الامور ..بدل اللخبطة وناخد تقريرها إلى طبيب آخر)
وواضح أن الام البسيطة اللى زيى وزيك هى اللى بتفكر صح ….هو ليه مفيش طبيب فكر فيهم انه يعمل كده (هو فى اتفاق بين الطبيب والصيدلية اللى جنبه لبيع أغلى مضاد حيوى…ولا ايه ؟…ياريت يكون تفكيرى غلط المهم طبيب الأشعة هو اللى حسم الموقف وأكد أن ده ورم فى الغدد الليمفاوية ولابد من التوجه إلى مستشفي سرطان الأطفال 57357…..والام توجهت بالفعل…. كان لى لقاء مع (ميار)لمدة ليلة واحدة..انا كنت محجوزة بالفعل وهى جت عليه لتستكمل علاجها وكان جى معاها باباها و مامتها وبعد حوالى ساعة من استقرارهم كان لابد من رحيل الأب وبدأ المشهد الذى اتحدث عنه …البنت رافضة تماما أن باباها يمشى وبدأ الرفض ينقلب لدموع ثم لصراخ شديد ..كانت حضناه بطريقة غريبة اوووى ايدها حولين رقبته ورجليها بين رجله زى اللى بتقول حاجة بحضنها ده
زي اللى بتقوله ضمنى خلينى استخبى فيك.
زي اللى بتقوله متسبنيش لوحدى انت آمانى.
زي اللى بتقوله انا خايفة طمنى .
زي اللى بتقوله انا موجوعة سكن آلمى.
شوفتوا الحضن وصل ليا ايه وانا بعيدة .،،،أمال وصله ايه بلمسته ليها.
فشلت كل المحاولات فى ترك البنت لحضن والدها سواء من (مامتها او منى او من موظف الامن)فعلا كلنا كنا بنحايل البنت وبنشغل تفكيرها بشئ آخر وهى على نفس الوضع …..عارفين مسبتشى باباها إلا ازاى؟……إلا لما راحت فى النوم وهى فى حضنه مشهد كله دموع ……ظاهره قااااسى اوووى…. بس باطنه مليان حنان ….حنان الأب يااااااااه هو الأب فعلا كل ده ….؟اه الاب ده نعمة كبيرة اووووووى من ربنا الأب اللى بتتدارى فيه من الدنيا كلها يبقى نعمة
الأب اللى مفيش حد يقدر يقرب ليك وهو جنبك ومعاك يبقى نعمة الأب اللى لما تبعد عنه بتحس بخوف وتوهان يبقى نعمة
لو فضلت أتكلم على نعمة الاب مش هيكفينى أوراق ولا أقلام
اب يعنى احتواء يعنى أمان يعنى واحد عايش علشانك انت بس علشان يسعدك ويريحك
الأب يعنى طول ما انت تعبان حاسس بألمك حتى لو بعيد عنك، مش عارف لدنيا طعم إلا بقربك …..هو ده الاب اللى لازم نقبل يداه ونتمنى رضاه وندعيله فى كل سجده ان ربنا مايحرمنا منه.رسالتى قبل ما تكون لكل ابن او ابنه بتكون للأباء. …سؤال بسيط انت فيك كام حاجة من اللى انا قلتها فوق؟
أنت الاب اللى هتوصل ابنك انه يحضنك كده ؟
أنت الاب اللى ولادك بيتمنوا ترجع البيت بدرى علشان تقعد معاهم ؟
أنت الاب اللى مش يخافوا منه بس بيحترموه؟
انت الاب اللى مالى عيون ولادك ومحسسهم أنهم أغلى حاجة عندك؟
يا جماعة الأبوة مش توفير طلبات وماديات وطول اليوم شغل وتعب الابوة هى انى اريح ولادى (مش راحة مادية …..اطلاقا….بل هى لمسة حانية على قلب أبنك )….فهمتونى
أحب اقول لكل ابن وابنه احمدوا ربكم على أباءكم (فمنهم تستمدون القوة والفخر)بوجودهم تتلبى كل طلباتكم ولو على حساب تعبهم ،وبقربهم بتحسوا بالامان والسند وكأن الاب قادر على حل جميع مشاكلك وان لم يقدر فدعوته بالدنيا .
اولادى وبناتى أحسنوا معاملة ابأءكم واستفادوا من خبراتهم وقربوا منهم حتى ترووا النفس بأجمل ما فيهم.
لو تعملوا كم من دمعة نزلت من عينه لحظت تعبكم…كم من ضيق فى الصدر لم ينفرج لعلمتم لماذا امرنا الله بالإحسان إليهم…. إلى كل اب لم يعرف معنى الابوة انت الخسرااااان….. هتخسر احلى احساس فى الدنيا.. احساس ان حد فرحان بوجودك +وهيتجنن ببعده عنك+والشخص ده حته منك=ده شعور لا يدركه الا الاب .
بس هقولك على حاجة الفرصة لسه أمامك …..قرب….قرب من ولادك …. حسسهم بحبك …اجعلهم اول اهتماماتك …عرفهم أنهم أغلى ما تملك …قولهم انت عايش علشنهم وبيهم. …قرب من تفكرهم…ووفر كل احتياجتهم على قد ما تقدر. …وقول لهم الكلام ده بلسانك وأفعالك ازرع… اكيد هيجى اليوم وتحصد إلى كل اب ولادك نعمة تستحق الشكر والحمد .
إلى كل ابن وابنه _ابأءكم نعمة تستحق الشكر والحمد .
ويارب يبارك فى كل اب يستحق هذه الكلمة العظيمة..ويرحم أبى لأنه كان خير الأب. اللهم اجعل المودة فى حياتنا،والمحبة فى قلوبنا،والابتسامة فى وجوهنا.
ربى انى أسألك من عظيم لطفك وكرمك أن تشفى ابنى سيف ،وميار وجميع اطفال 57357 وتمدهم بالصحة والعافية انك على كل شئ قدير.. شكرا مستشفي سرطان الأطفال 57357 ولكل من ساهم برسم البسمة على وشوش أولادنا ….جزاكم الله كل خييييير
ربى اختار لى ما هو خيرا لى
التعليقات مغلقة.