حظ التعيس… أيامي كالاوراق بقلم حماده ريحان
أنا لما اقول خفيت
كان قصدي إني نويت
أدخل في غيبوبة
دا الصورة مقلوبة
والطوبة معطوبة
ماعدتش تبني البيت
الزرع كان في الغيط
محتاجني لجل اسقيه
دلوقتي هبكي عليه
او يبكي هو عليا
وانا حالي من حاله
متكتفة إيديا
ودموعي مواله
فأرجع واقول حنيت
مع اني كنت نويت
ابعد بعيد خالص
ونفضها مجالس
ماهي دنيا بتعاند
لو قلت يوم حبيت
بلاقيني جنب الحيط
ساند ومش مسنود
ضهري انحني كالعود
من كتر شيل الهم
الدنيا فانية ياعم
يانعيشها زي الناس
يانموت ونهدر دم
انا لما اقول عديت
من وسط مليون حيط
كان قصدي اني فشلت
والنوم علي الاسفلت
خد من جنابي راق
أيامي كالاوراق
ييجي الخريف تسقط
واتعري زي الشجر
وفي الامتحان بسقط
شارعنا فيه مسمط
م الجوع لعابي يسيل
فتشت في المنديل
علي قرش يسعفني
الخوف مغلفني
ليكون مافيهش فلوس
الدنيا تدي دروس
مين بس يتعلم
حظ التعيس متعوس
حاضنه وبيسلم
حمادة ريحان
التعليقات مغلقة.