حكاوي سمسمة ” أبيَّن زين أبيَّن “
بـ قلمي /أسـمـاء الـبـيـطـار
أبيَّن زين أبيَّن و اضرب الودع
جملة بقالي زمن ما سمعتهاش ، أو انا اصلا ما سمعتهاش غير في الأفلام .
كانت واحده ماشية إنهاردة و بتنادي ” أبيَّن زين أبيَّن ”
محدش نادي عليها ووقفها .
إستغربت !
إن محدش عنده الشغف إنه يعرف إييه اللي في جراب الحاوي بتاعها !
و دماغي راحت مع الناس في كل بيت ، و متأكدة إنهم سمعوها زي ما أنا سمعتها .
و فضلت أكلمها بيني و بين نفسي …
و قولتلها :
عارفة لو قولتي :
أبيَّن زين أبيَّن و أخفف الوجع .
أو أبيَّن زين أبيَّن و اجبُر الخاطر اللي إتكسر .
أو أبيَّن زين أبيَّن و أشيل حبة من الهموم اللي على كتاف الجدع .
يمكن كنتِ تلاقي معظم الناس وقفتك .
مش علشان مصدقينك .
لأه ..
لكن علشان ما فيش حد بقى يطبطب على حد بـصـدق .
معظمنا بقى يطبطب مصلحة و نفاق و يمكن خوف !!
و قليل اللي بقى يُجبر الكسر !
و يشيل حبة من الهموم اللي غرقانين فيها .
أنا بقول يمكن .
و إلى لقاء آخر من حكاوي سمسمة ..
التعليقات مغلقة.