حكاوي سمسمة أبيَّن زين
” جري إييه “
بـ قلم أسـمـاء الـبـيـطـار
ديماً كنت بقول ” ليت شجارنا كشجار الأطفال “
لما كانت الأمهات في الحارات ، أو على سلم العمارات بين الشقق ، أو في النوادي ، تقف تتخانق مع بعض علشان خاطر الولاد .
و تلاقي الولاد سابوهم و راحوا يكملوا لعب .
ليت الكبار يفعلوا .
يعني كل واحد يطلع اللي عنده بذوق و بأدب و نرجع زي ما كنا .
لكن للأسف اللي بيحصل غير كده ، كل واحد بقى يشيل من التاني و كأنه عدوه ، لا عتاب ، و لا صفى ، و ضاعت المحبة !
و بقينا عاملين زي ” الجمال ” بنخزن لبعض !
و زي ” السمك ” بناكل في بعض !!
أنا عن نفسي كبني أدمه عُمري بالعمر اللي عشته ده ما شلت في قلبي حاجة لحد .
لو زعلانه من حد بقوله ، و بصفي نيتي من ناحيته تماماً أياً من كان . و لو زعلانه قوي ، ببعد لحد ما أروق و بعدين أعاتب .
و لو غلطانة بعتذر ما معديش أي مشكلة مع الصُغير قبل الكبير .
ما عنديش مشكلة مع إبني الصُغير ده
” هو مش صغير اوي يعني هو رايح أولى ثانوي”
لو قسيت عليه في موضوع شوية ، و حسيت إني كبرت الأمور زيادة عن اللزوم بروح لحد عنده براضيه و بستسمحه كمان ، و يمكن يبقى فيها حاجة حلوة ، لإنه حقه .
لكن اللي بيحصل دلوقتي إننا فعلاً بقينا نهجر بعض عفواً بغباء !
بنمشي و بندي ضهرها لبعض بالأيام و الشهور و يمكن بالسنين !
جملة إستغربتها من حد قُريب لما قال : أصل دا طبع عيلتنا !
يعني ” زعلهم وحش “
و لو الأم زعلانة من حد الكل بيزعل على زعلها !
يعني ” بيربوا عداوة من لا شئ ” ؟!
حتى لو لأقرب الناس ليهم ، و بدل ما هيبقى العتاب لفرد ، هيبقى لأسرة كاملة ، و يزيد النفور !
و المشكلة الأكبر في الأسر اللي زعلها وحش دي و عاملين
” عزوة في الغم ” بعد الأم ما بتروح للأسف زعل ولادها بينهم و بين بعض بيبقى بنفس الطريقة ؟!
يعني هيبقى ” سلسال قطيعة ” ؟!
اللي بيخلي العلاقات ” تنور و تستمر “
الوضوح و الصراحة و اللين .
إحنا مش داخلين معركة واحد كسبان و التاني خسران ؟!
إحنا اللي بينا علاقات إنسانية قبل ما تكون أسرية أو إجتماعية .
يعني القريب صلة رحم ، و الجار ما فيش غني عنه .
و حتي لو اللي قدامك طبعه قاسي ، ما تبقاش زيه .
و إلا هنبقي في غابة ، دا إذا ما بقناش فعلاً ؟!
و حقيقي بعض الناس من طول فترة الخصام ، بقت تنسى أصل المشكلة كان إيه ؟!
فتحنا عنينا زمان على مجلس الصُلح أو قاعدة الصفا .
لما كان فيه زمان كبير للأسرة أو للشارع بيلاقي فترة الخصام طولت بيجيب الطرفين و يصفي ما بينهم و تنتهي المشكلة .
طول فترة الهجر ” بتقسي القلوب ” و بتخلينا ننسى بعض .
و لا أجد ختام أفضل من حديث رسول الله صلى الله عليه و سلم
” لا تهجر أخاك فوق ثلاث “
و إلى لقاء آخر مع حكاوي سمسمة ..
التعليقات مغلقة.