حكاوي سمسمة “الثقة بالنفس و التقدير”…
بـ قلم أسـمـاء الـبـيـطـار
في يوم كنت محتارة عن موضوع أكتب فيه ف قولت لإبني الصغير ها نكتب عن إيه إنهاردة يا عبد الرحمن .
بدون تفكير قالي أكتبِ عن ” الثقة بالنفس ” يا ماما .
لكن بيني و بينكم ما إستغربتش من عنوان الموضوع لأنها نقطة خلاف كبيرة بيني و بينه في النقاش دايماً .
هو على الصعيد الدراسي مستواه ما شاء الله لا قوة إلا بالله ممتاز .
لكن .. دايماً دايماً بيشك في إجابته و متردد مع إنها صحيحة .
و دي كانت المشكلة .
دايماً أقوله إنت صح يا حبيبي و شاطر ليه بتسأل ؟
يقولي : عاوز أتأكد !
المهم ..
مُجرد الشك شئ مش طيب بالمرة لان الإنسان مجرد أن دخل بقلبه فكره الشك ، ضاعت الحقيقة ، و لو ضياع مؤقت .
لكنها للأسف ضاعت في وقت مناسب ، و تاكدنا منها بعد فوات الأوان
الثقة لابد أن يسبقها دائما اليقين في نفسك و في قدراتك العقلية على الإستيعاب و التخزين و إسترجاع المعلومات على الصعيد الدراسي على الأقل .
و بالنسبة للولاد و البنات في مرحلة الدراسة بالذات .
لازم الأول تاخد بـ إيد نفسك قبل أن تسأل و تُشكك في قدراتك و تتسرع في السؤال هنا و هناك و اللي من الممكن بل و من الأكيد إن اللي بتسأله يشكك أكتر و يضيع المعلومة الصحيحة منك .
إسأل نفسك و جاوب و راجع الإجابة من كتابك مرة و إتنين و تلاته و عشرة .
لكن ..
إذا كنت مضطر فعلاً للسؤال فلابد أن تسأل أهل الثقة كمعلمك .
كي يثبت لك المعلومة أو يصححها لك .
دايماً نسمع إن بين الثقة بالنفس و الغرور شعرة .
و أرى أيضاً أن بين الثقة بالنفس و التردد ” ضياع ” للكثير من الجهود ، و تصيد البعض لك لكي تضيع ” ثقتك بنفسك ” .
فلابد أن تثق في نفسك لا لدرجة الغرور ، و لا لدرجة التشكيك في قدراتك .
أما عن التقدير ..
و يمكن يكون مرتبط بالثقة بالنفس ببعض كلمات التشجيع منذ الصغر
على المستوى الدراسي أو الشخصي في بعض المواقف التي نقودها
أو نتصرف فيها بطريقة صحيحة .
و يمكن أنا من الناس اللي إتربيت بالطريقة دي من أبويا الله يرحمه ، و من أعمامي و عماتي ، دايماً دايماً كان في كلمة طيبة في موقف إتصرفت فيه صح .
دايماً كنت بسمع كلمة ” براڨو عليكِ “
أو بكل هدوء تصرفك صح ، لكن الأفضل كان يبقى كذا .
و من هنا بنبدأ نتعلم صح ، و في نفس الوقت بنكتسب ثقة في أنفسنا و بتكبر معانا ، بطريقة سليمة و من مصادر موثوقة .
لكن للأسف ساعات كتير من عُمرنا بيروح و إحنا مستنين كلمة تقدير
تخلينا نكتسب الثقة دي .
البُخل في التربية مش حلو .
الكلمة الطيبة في الموقف الصح مش دلع .
إنك تدي لأولادك ثقة في قدراتهم منذ الصِغر مش عيب .
و حقيقي فرق كبير ..
إنك تكون عارف قيمة نفسك و قدراتك وواثق فيها .
و إنك مستني حد يديك الثقة دي .
تأملوها علشان ناس كتير عُمرها ضاع و هي مستنيه اللي يقدرها .
و إلى لقاءٍ أخر مع حكاوي سمسمة ..
التعليقات مغلقة.