حكاوي سمسمة “الطبطبة “.. بقلم أسـمـاء الـبـيـطـار
" الطـبـطـبـة " كلمة في أغنية بقت أشهر من النار ع العلم ؟!
مع إننا بنقولها و بنادي بيها من زمان !!
و علشان معظم الناس معندهاش إستعداد ” للطبطبة ” ؟!
أخدت الكلمة بمحمل السخرية !
مع إنها أساس الحياة بالبلدي كدة البنزين أو الطاقة اللي بتمشينا علشان نقدر نكمل مشوارنا ف الدُنيا .
الكلمة دي اللي طلعنا لقينا أهالينا ما يملكوش غيرها
الكلمة الطيبة ، و جبر الخاطر ، و الطبطبة ، و الحنية ، و الدعوة الحلوة اللي بتخليك ماشي بتقول ” يا أرض اتهدي ما عليكِ أدى “
و اللي كان بيصبرنا على أي حاجة بنحكيها بتوجعنا
جملتهم ” إن ما فيش حاجة بتفضل على حالهااااا “
ساعات كتير بيبقى الواحد عاوز كلمة من حد
تعرفه انه صح و لّا غلط ؟؟
الواحد مهما كبر بيبقى عاوز كلمة تصُلب طوله .
صحيح الصبر على البلاء نعمة .
زي منهج جدتي أم ابويا ، و منهج أمي
بس بردوا لازم ناس تحسسك إنك بتتعامل صح
في الدُنيا .
و دي مش شوية علشان تمشي في الدُنيا
و تحس إنك على الأقل
مش مكسور و مش غلط .
مش مستني الدنيا تتغير بعد عُمر
يا عالم هتبقى موجود و لّا مش موجود
الخُلاصة …
خلي في حياتك ناس حلوة تطبطب عليك
تحبك بجد تنصحك و تصلب طولك
و ناس ترد فيك الروح الحلوة اللي
تصبرك على مُر اي مُر .
يمكن أنا دلوقتي و بكل صراحة اللي مقويني على الدُنيا كلام ناس راحت زي أبويا الله يرحمه و جدتي
رغم إن هم في عالم و إحنا في عاااالم
لكن كلامها محفور جوايا ، دعواتهم سند و على يقين إنها باقية و ماشية بيها لحد دلوقتي .
و ناس تانية كتير قابلتهم مؤخراً بعد العُمر ده مش منّي لكن مقدرش أقول غير إن أصلهم طيب ، و مزروعة فيهم بذرة الخير .
مش بسيطة إنك تلاقي حد في الزمن ده ” يطبطب عليك “
لكن لو لقيته أوعى تسيبه أو تهمله لأن دا مصدر النور في حياتك .
و إلى لقاء أخر مع حكاوي سمسمة ..
التعليقات مغلقة.