حكاوي سمسمة المدام محتاجة تسافر العزبة بـ قلم أسـمـاء الـبـيـطـار

حكاوي سمسمة المدام محتاجة تسافر العزبة بـ قلم أسـمـاء الـبـيـطـار

جملة أكيد كلنا سمعناها في أفلام الزمن الجميل ، و اللي ناس كتير للأسف في الوقت الحالي وخداها بتريقة !

نقول حكاية بسيطة كدة و بعدين ندخل في موضوعنا ..

زمان و أنا صُغيرة لما كنت بروح أكشف عند الدكتور و بشكوى عضوية كان دايماً بيدأ كلامه معايا ب ” مين اللي مزعلك ” ؟
أو زعلانة من إيه ؟ أو في مشاكل عندكم في البيت ؟!
كنت بقعد قدامه مستغربة من كلامه كطبيب !
و اللي بيني و بينكم في الواقع صح .
و هنرجع لباقي الحكاية الصُغيرة دي بعدين .

ندخل في موضوعنا ..
كتيييير مننا بيقع من طوله مرة واحدة !
و فجأة تلاقي الدُنيا صحياً ملخبطة معاه من جميع النواحي !
في إيه مش عارفين ؟
دا كان لسه معايا أو قدامي أو نام و صحي لقى نفسه كدة ؟!
أو مش معقول الموقف البسيط اللي حصل دا يعمل فيه كدة ؟!

كتيير من المشاكل العضوية اللي إحنا فيها سببها نفسي .
سببها تراكمات جواك .
من سوء تقدير ، لسوء فهم ، لإهمال ، لتنازُلات ، لإهدار حقوق

” لخوف ” و حط تحت خوف دي مية خط .
خوف من إنك تخسر اللي قدامك إذا كنت متعلق به .
أو لضعف في شخصيتك و مش عيب لان دي طبيعة و كتير ما بنقدرش نغيرها .
أو لغلظة الطرف الأخر و الخوف من عنفه .

فبنسكت و نشيل جوانا مرة بعد مرة ، و يوم بعد يوم ، و كل دا و إحنا ماشيين و مش حاسين إن البركان اللي جوانا ممكن ينفجر في أي لحظة .
لحظة مش محسوبة ، و لا معروف وقتها .
لكن في قبلها مقدمات إنك بتنطفي ، بتسكت ، لمعة عينيك حتى في الفرّح مش موجودة !

و يمكن إنت كمان تستغرب من إيه اللي بيحصل لك دا !
لأننا دايماً بنبرر اللي إحنا فيه بالسن
أو يمكن لانك اتهديت و بقيت تنسى و تعدي و أنت مش في وعيك إن حتى اللي عديته دا آذاك و لّا لأ !

لكن وقتها بيكون فات الأوان و فعلاً بقى عندك مرض عضوي و مُزمن

فاكرين حكايتنا الصُغيرة اللي في الأول .
مُجرد كلمة الدكتور ليا مين اللي مزعلك ، أو زعلانة من إيه
بتحس إنك بقيت كويس مُجرد إنك لقيت حد حس بيك أو عارف إنك زعلان ، و إن اللي فيك ممكن يروح بكلمة ، و دا بتتأكد منه بعد ما بيكشف عليك و بيلاقيك عضوياً سليم

الحقيقة ..
المدام مش محتاجة تسافر العزبة
و لا البيه محتاج ياخد شنطته و يسافر يومين

الحقيقة إننا محتاجين نطيّب خاطر بعض
و زي ما فيه كلمة بتوجع القلب و تخليه مية حتة
في كمان كلمة بتراضيه و تسعده و تخليه صافي علشان يقدر يواصل

و بتدور الأيام علينا و حقيقي بنبقى محتاجين كلمة تسندنا .
لأن لو فكرنا نعيش بمبدأ ” أعتزل ما يؤذيك “
في الزمن اللي إحنا فيه دا .
يبقى هنعيش منعزلين عن الدُنيا كلها .

الدعم النفسي أفضل شئ ممكن تَطيب بيه النفس من كل أوجعها حتى لو فيها أمراض الدُنيا .

و إلى لقاءٍ أخر مع حكاوي سمسمة ..