حكاوي سمسمة : تزوجوا بالعرف
بـ قلم أسـمـاء الـبـيـطـار
عارفة إن العنوان ممكن يثير غضب ناس كتير ” تزوجوا بالعرف “
و عارفة إني ما كتبتش كلمة ” بالأصول “
و إن هي اللي لازم تبقى في صدر العنوان ، لكن للأسف موضوع الزواج دا بالذات ، ناس كتير مشيت حسب الأصول .
و للأسف بناتها إتبهدلت !
لأنها كانت ناس مُريحة و متواضعة و بسيطة و قدرت إن اللي جاي ياخد بنتهم زي إبنهم .
لكن للأسف بيحصل عكس النوايا تماماً .
و علشان نبقى منصفين كالعادة هنقول ” إلا من رحم ربي”
و دوول قلة قليلة في هذا الزمن
ندخل في موضوعنا
و المقال هنا هيبقى من أول بيت القصيد ” قايمة الفرح و خلافه”
اللي الناس الطيبين ، و اللي ” بيوفقوا راسين في الحلال “
بيبقوا عاوزين يلموا الدُنيا ، فبييجوا على حقوق البنت .
إنها تكتب قايمتها بقيمة بسيطة ، و مش قايمتها الحقيقية حتى من باب
” حقي و حقك “
و لملم الدُنيا و بلاها شبكة و دبلتين و مشى حالك !!
و لملم الدُنيا و خدي فستان بنت عمك دا يا دوب ساعتين زمن !!
و لملم الدُنيا و بلاش كوافير و إتذوقي هنا في البيت !!
و لملم الدُنيا و بلاش فرح و نادي ، ما حدش بيعجبوا حاجة و أنتم أولى بمصاريف الفرح !
و بيفضلوا يلملموا في الدُنيا لحد ما البنت فرحتها بتتكسر في كل حاجة
و تخيل اللي عاوز يلم الدُنيا دا ، ضيع أبسط حقوقها من الأول .
أي نعم النية خير ما قولناش حاجة ، لكن للأسف الطرف التاني ما بيقدرش ده !
و مهما كانت حالته للأسف بيجيله وقت ” و يعايرها ” لمُجرد إنهم
إتنازلوا من باب الرحمة و العون !
و حتى لو العكس و الراجل معاه و ” عامل كريم ” و شال معظم الأمور ، مسيره هييجي يوم بردوا و يعايرها !!
يعني من الأخر البنت هي اللي متضررة نفسياً و مادياً في جميع الأحوال .
يبقى نمشي بالعرف و كل واحد يلتزم بالأمور اللي عليه
سواء البنت أو الولد .
و العُرف بيختلف من محافظة لمحافظة و من بيت لبيت .
و أكيد لو الزوجين من محافظة واحدة بتبقى الأعراف محفوظة .
يعني أهل الولد معروف ” بيشيلوا ” إيه و كذلك أهل البنت .
أما لو من محافظات مختلفة .. فبتكون الأمور بالاتفاق و الرضى بين الطرفين .
الأمور دي الناس فكراها بسيطة ، لكن تأثيرها النفسي فيما بعد سئ جداً جداً ، و نزناز كلام يمكن يفضل طول العِشرة .
أكيد مش بتكلم من فراغ ، دا غير المشاكل اللي الواحد بيشوفها على الميديا من نفس النوعية دي .
اللي فيها البنت بتطلع بشنطة هدومها !
و ساعات الولد ما بيطولش حاجة من تعبه و شقاه !!
ما تسهلوش أمور هي في النهاية أعقد ما يكون شئت أم أبيت
بنتك تطلع من بيتك معززة مكرمة ، يا إما ما طلعهاش عفواً أكرملك و أكرم لها .
حقها إنها تفرح و بيتها الجديد دا كل حتة تبص فيها تلاقي إنها شاركت فيه بالمعقول لو عاوزين الحياة تبدأ بسلام .
و عفواً إبنك لو مش أد مسئولية فتح بيت ، يبقى بلاها بهدلة ليه و لبنات الناس .
لأن لو حصل في الأمور أمور وفي الزمن ده وااارد جداً
و قلت لبنتك : أنا اللي عملت فيكِ كدة مش هترجع اللي كان و لا حتى كلمة إتقالت وقت هزار كسرتها و قلة قيمتها و لقت نفسها صُغيرة بحاجات بسيطة كانت في أيدينا من الأول .
الزواج حقوق قبل ما تكون مسئولية و للطرفين مش لطرف على حساب الأخر .
إتكلمت في موضوع للأسف مادي ، لكن العائد منه نفسي بالدرجة الأولى و للطرفين على حدٍ سواء .
و إلى لقاء أخر مع حكاوي سمسمة ..
التعليقات مغلقة.