حكاوي سمسمة خد بالك…بقلم أسـمـاء الـبـيـطـار
” خد بالك ” كلمتين كتير مننا بياخدهم على قلبه لما بنسمع من حد نصيحة أو توجيه أو إن حد ينبهنا لعيوب فينا ممكن تتصلح أو تتقوم
كتير بنبقى متأكدين إن كلامهم صح لكن ساعات قلة الخبرة و العِند و التسويف بيخلينا نسد ودانا للأسف .
و بنعاند أكتر و بنسوق فيها بالبلدي زي ما بنقول
يمكن بقصد أو بدون قصد لحد ما بنوصل لمرحلة عيوبنا بتبقى كارثة صعب إنها تتصلح بين يوم و ليلة .
و لو فوقنا لنفسنا و حاولنا نبدأ من جديد بنحتاج طاقة غير طبيعية
و مجهود جبار يمكن يستنزف اللي باقي فينا لحد ما نشوف نتيجة ملموسة ترضينا .
يعني مثلاً .. لما توجه إنبك إنه يضع الأشياء في مكانها مش معناها إنك بتتهمه بالسلبية و الإهمال .
أو إنك تشاهد سلوك غلط سواء فعله بقصد أو بعفوية و تقومه
مش معناها إنك بتتهمه بسوء الخُلق .
أو إنك تلاحظ إن إبنك شاهد سلوك سيء في المجتمع و سِكت .
هنا لازم يكون لك واقفه معاه .
و لابد أن تسمع رأيه بكل صراحة ووضوح علشان تعوده إنه ما يكونش إنسان سلبي في مجتمعه و تتأكد إنه ما يوصلش للسلوك دا مع الوقت .
و بمُجرد إنك شاهدت شئ غلط مرة بعد مرة وجب عليك التنبيه .
لأنك إذا أهملت التنبيه سيتعمّد الفعل بعد ذلك و ببرود تام حتى و إن كنت تراه و عينك في عينه و كأن الأمر أصبح شئ طبيعي و حتماً سيُقلد .
تخيل إننا بنتكلم عن عيب أو سلوك فردي لفرد في أسرة صغيرة .
ما بالك لو سلوك ممكن يضر مجتمع بأكمله و للأسف ممكن يُصبح ظاهرة تتفشى و تُخل بقواعد المجتمع و ثوابته .
أكتر حاجة ممكن تؤذينا على المستوى الشخصي و المُجتمعي
إننا ما نقدرش نفرق بين اللي خايف علينا و بين اللي عاوز يكشف عيوبنا و السلام .
لازم يكون عندنا وعي كافي إننا نستوعب الكلام و النصيحة و التوجيه .
و تحجيم المشكلة قبل أن تتفاقم و تُصبح ظاهرة أو كارثة تضر بالجميع .
و حقيقي دا مش هيتم إلا إذا رغب الشخص و تكاتف المجتمع بجميع عناصره الفعالة و رغبوا في التغيير للأفضل .
و إلى لقاءٍ أخر مع حكاوي سمسمة ..
التعليقات مغلقة.