حكاوي سمسمة ..ظلم الأبناء للأباء
بـ قلمي / أسـمـاء الـبـيـطـار
من صُغري و أنا بسمع أبويا الله يرحمه
يقول : أنت و مالك لأبيك .
و هنرجع للجملة دي في أخر الحكاية .
ندخل في موضوعنا ..
كتير من الأبناء بيظلموا آباءهم في حياتهم و حتى بعد مماتهم !!
معظم الشعب من الطبقة المتوسطة ، يا إما موظفين بدخل محدود .
أو أعمال حرة بسيطة و يا دووب اللي جاي على أد اللي رايح .
و في كلى الحالتين يا دووب العيشة بتبقى ماشية بالستر .
و كانت الأجيال السابقة بتقدر العيشة دي ، و يمكن كانت بتشتغل في إجازات المدارس و تساعد نفسها علشان تخف الضغط عن الأب شوية
لكن الأجيال الجديدة و طبعاً إلا من رحم ربي ، بتبقى مستنيه كل حاجة من الأب !
أكل ، و تعليم ، و فُسح ، و خطوبة ، و زواج ، و ما بعد الزواج أيضا !
على الرغم من إنهم عارفين الظروف كويس جداً !
لكن من باب حضرتك لازم تتصرف ؟!
و يمكن في شباب بتأجل مشروعاتها المستقبلية لحين خروج الأب على المعاش .
علشان مكافئة نهاية الخدمة ؟!
و من هنا بتبدأ مشاكل لا حصر لها للبيت كله .
أكيد أعمار الأبناء مش متساوية و علشان يراضي حد و يمد إيده في مساعدته يبقى باقي إخواته أكيد هيتظلموا .
و من قبلهم الأب نفسه اللي بقى في سن محتاج لراحة ، و علاج ، و بيت مفتوح لازم ما يتأثرش .
و كأنه عاوز ” يورثه بالحيا ” !
و حقيقي بعض الأبناء بتحسس أباءها بعجز شديد
إنه مثلاً ما أمنش مستقبلهم !
بعض الأبناء بيدفعوا الأباء لتحمل اعباء فوق طاقتهم المادية لكي يرضوهم و لا يشعروهم بنقص !
بعض الأبناء بيدفعوا الأباء للاقتراض البنكي علشان يسافر أو يتجوز أو يفتح مشروع أو أو أو و بيسيبه غرقان في الديون ، و للأسف دون النظر لأي عواقب !
بعضهم ينظر إلى نفسه فقط .
و كتير من البيوت تأثرت بسلبية بعض الشباب الولاد
و البنات كمان على فكرة مش بعيد عن الموضوع دا .
البنت اللي بتضغط على أهلها إنها تتجهز زي فلانه ، اللي هي مش أحسن منها في حاجة !
و لازم تدخل بشئ و شويات ، و يمكن يكون أهلها لسه بيسدوا في أقساط جهازها و للأسف بعد سنة أو سنتين بتكون إنفصلت ؟!
و أكيد شوفنا نماذج كتير من دي .
و حقيقي أسوء جملة ممكن تسمعها سواء من إبن أو إبنه بعد رحيل الأب ( ما عملش لنا حاجة ) ؟!
الأب مش فرض عليه إنه يكمل مشوارك في الحياة .
الحياة علشان نحس بيها لازم نجتهد ، و نتعب شوية علشان نحس بقيمة الحاجة اللي إكتسبناها و نحافظ عليها .
علشان نعرف قيمة العمل و القرش اللي عمره ما بييجي بالساهل .
و علشان نكون منصفين زي ما إحنا متعودين ..
في أباء ساعدت أبنائها في كل شئ ممكن نتخيله .
لكن للأسف معظم النتائج سلبية في حياة الأب و أسوء بعد رحيله .
ووجهة نظري المتواضعة في الموضوع دا ..
بما إني أنتمي للطبقة المتوسطة
يكفيك من أبيك أنه تكفل بك منذ الصغر إلى أن أخذت شهادتك
و ساعدك قدر إستطاعته ، دون فرض أو إجبار .
يكفيك من أبيك أن يتركك مستور دون ديون .
يكفيك من أبيك إنه إنشغل بتربيتك و تعليمك لا بجمع المال و تركك دون أخلاق و بلا هدف .
يكفيك من أبيك الغرس الطيب للقيم و المبادئ اللي بتخليك إنسان في مجتمع ندر فيه الثبات على المبدأ .
يكفيك من أبيك أن يترك بينك و بين إخوتك المحبة ، لا العداوة و البغضاء .
يكفيك من أبيك إنه الإنسان الوحيد الذي يدفعك أن تكون رجل يُعتمد عليه .
يكفيك من أبيك دعوة الناس لك و لمن رباك .
الحقيقة اللي لازم ندركها ..
إن كل واحد له رسالة في الحياة لازم يقوم بيها و يخوض التجربة بنفسه .
و أسوء شئ في الحياة الإعتماد الكلي على أي شخص مين ما كان
لأن لو سابك في نص الطريق لأي سبب صدقني هتووووه .
و إلى لقاءٍ أخر مع حكاوي سمسمة ..
التعليقات مغلقة.