حكايا واحة ٥٧ “أمر من المر “

جيجي حافظ

هل ابكى وجعا على الم ابنى…..ام ابكى تضامنا مع اوجاع الناس …..؟
هل اكتم ما اراه بعينى …،ام اقصه عليكم ……؟
ربى اعنى ان اتقبل كل ما اعطيته لنا برضى وتفاؤل و يقين بانك انت الرحيم ……
امر من المر
لو خيارونى بين ابتلاءين( المرض- الفقر)…..كنت اختارت الفقر….لانى جربت صعوبة الالم اللى بتحمله لحظة صرخة ابنى من الوجع……….
……..بس لحظة كده…….
انا لم اجرب ان ابنى يطلب منى حاجة عاوزها او نفسه فيها وانا مش قادرة اجبها له(اللهم لك الحمد والشكر )
ياترى دى ذى دى ….انا باعتقادى ان وجع الفقر اهون من وجع المرض ….ودى وجهة نظرى وأعتقد أنكم متفقين معى حتى الآن……………
فى يوم من ايام الكشف وانا فى انتظار دورى جلست بجانب سيدة عرفت انها محجوزة فى المستشفى…سألتها محجوزة جرعة؟…قالتلى لا ….محجوزة مناعة……(الكلمة دى فى العادى صعبة علينا جدا لان الطفل بتبقى مناعتة قليله جدا وبيبقى عرضه لاى ميكروب … وكمان بيتم تاجيل الجرعة فيأخر العلاج….والامر ده متعب جدا)…..فقولتلها ياااااااه معلش ربنا هيعينك انا عارفة انها متعبة وبتعطل الجرعة والعلاج كله لحد ما الطفل مناعته تنظبط…..لكن…..رد فعل الست دى كان غريب جدا…..قاااااالتلى على ايه يعنى دا كده احسن !!! استغربتها اوى وقولتلها بتقولى ليه كده(يعنى انت عاوزة ابنك يتحجز مناعه ،قالتلى ياااااااريت….(على لسانها)!!!!!!!! وبدأت تنفجر بالكلام …..
على الاقل هيلاقى لقمة عدله يأكلها….انا بفرح لما بتحجز فى المستشفى علشان بيتغذى (لبن وبيض وجبنة الصبح….وفى الغذا حتة فرخةواكل عمرى ما عملته فى بيتى وباليل ذبادى وعصير وفاكهة…..وحاجات حلوة كتير له وليا انا كمان )كل ده ومش عاوزانى افرح ده كله غير النظافة والرعاية والتكيف….وغيره غيره…..الست قعدت تتكلم على كل حاجة فى المستشفى كانها أمله ……بتقولى انا لما اروح اجبله الحاجات دى كلها منين اسكتى يا مدام ….(الحوجة وحشة)………
فضلت تتكلم وانا مش سمعاها خلاص….سرحت فى النعيم اللى عايشين فيه ومش حاسين بيه …الكلام كان بيصفعنى على وجهى….
حد فينا فكر فى علبة الذبادى دى اللى بيجبها لابنه تساوى ايه عند ناس كتير تانين ……؟
حد فينا فكر يبص للتكيف اللى فى اوضته ويحمد ربنا عليه…..؟
حد فينا فكر فى الفاكهة اللى بتجبها اد ايه هى نعمة كبيرة اوي عند الفقرا…..؟
حد فينا فكر فى الزوج (او الزوجة )المسؤل عن كل احتياحتنا ان يشكره ويحمد ربنا عليه ؟
احبائى …..احنا فى نعم كتيييييرة قوى اعتادنا عليها حتى اعتبرناها اشياء عادية لكنها نعم…،ونعم….ونعم…يعرف قيمتها من لم يجدها…مهما كانت قليلة فى نظرك فهى كبيرة فى عيون الغلابة .،..فاحمدوا ربكم على كل نعمة…
يا جماعة الست دى حبت مرض ابنها برغم وجعه…لان واضح ان الم الفقر بالنسبة لها اصعب بكتيييير من الم المرض اللعين وقسوته…
هل المجتمع ده قاسى لدرجة انه وصل الانسان الفقير انه يستحسن المرض ليوفر احتياجاته البسيطة………؟
…….ام رحمة ربنا التى جعلت من المرض نعمة يكمن فيها الرزق لها ……..
يااااااا الله ……….حتى المر بقى فيه امر منه
اعانك الله على مرض ابنك ….ورزقك من حيث لاتحتسبى …
احنا فى دوامة الحياة نسينا الناس دول ……فلابد ان نعيد النظر لحياتنا…..الناس دول لها حق عندنا كلنا ياريت نبدا بانفسنا …..قبل ان ياتى يوم ونردد (ياليتنى قدمت لحياتى)
حاسبوا انفسكم قبل ان تحاسبوا
احنا محتاجين (مساعدة الغير) ان تتسلل الى قلوبنا ….وان نخرج من حب الذات الى حب الاخر……صدقونى احنا اللى محتاجين لهم اكتر لانك هتخرج الحزن والهم من حياتك وتستبدالهم بالتفاؤل واسعاد الاخرين.
نحن نحتاج احيانا الى من يطرق ابواب قلوبنا ليظهر ما بها من رحمة….متعكم الله بالسعادة والصحة والانسانية.
انا بجد بشكر مستشفى 57 علي هذه الرعاية المتكاملة التى تبهر كل من آتى اليها..،ربنا يحميها ويحفظها من كل سوء ويزدها علما وفضلا ….
يارب سلم ابنى و كل اطفال ٥٧ من الآه واشفيهم واشفى كل مريض.
ربي اجعلنى راضية اينما طاف بى القدر

                              منك العون يا الله