حكايا_واحة57
بقلم جيجي حافظ
عندما لانبكى على احزاننا فهذا لايعنى أننا أقوياء……….
بل احزاننا لايعادلها بكاء _فصمتنا و صبرنا .وتعلمنا أن أثمن أنواع البكاء هو البكاء بين يدى الله ومناجاته والتضرع له حكاية منة
منة البنوتة الحزينة. ….لاول وهلة توقعت انها بنوتة هادية ولكن عندما ركزت فى عينها بدا لى الحزن العميق الواضح وضوح الشمس …….ياترى ليه الحزن ده كله ؟
يمكن علشان هى بنوتة عندها 11 سنة فمدركة ما تعانيه اكثر من الاطفال الاصغر سنا…….يمكن ! 2ولا علشان ظهرت عليها اثار الكيماوى…… طبعا انتو عارفين ان سر جمال البنت شعرها …..وبرضو عارفين ان اول حاجة بيأثر عليها الكيماوى هى سقوط الشعر فهل هى حزينة على شعرها ؟
هى بجد حاجة توجع القلب انا عارفة انها بتتألم من كده بس ياترى هو ده سبب الحزن العميق ده …….يمكن؟
3_ هى تعبت مرة وهى بتأخد الكيماوي وبسبب قلة الأكل تعرضت لمضاعفات ودخلت العناية المركزة ،وطبعا كانت لوحدها من غير حد .وده كان مخوفها اوى،يمكن تكون خايفة أنها تعيد تانى نفس التجربة …..يمكن!
كل دي احتمالات انا توقعتها. ….لكن ايه الحقيقة… الله اعلم؟
.كنت بحاول اضحك مع البنت واتكلم معاها لكن كانت منطوية قوى ورافضة حتي الكلام معايا .
عارفين مين كان مرافق معاها؟
جدتها…..شئ غريب ومحير. ….وبدأت اتسأل فين مامتها؟ بس كان الرد أغرب قالتى الجدة أصل البنت متعلقة بيا قوى. ..
برضو فين الأم ….
قالتى …..( احنا عندنا دوار كبير وامها بتخدم فى الدار وبتحلب البهايم وبيشتغل فى الفلاحة).ومش هينفع تسيب ده كله وتقعد معاها الفترة دى كلها
يااااااااااه. ….وسابت الام بنتها.
ده جبروت. ……ولا ده افتراء. ….ولا ده طبيعى وانا اللى غريبة ….
اكيد الأم بتموت هناك، ….انا حاسة بيها اكيد الناس دول ظالمنها وجايين عليها قوى( الأم محتاجة بنتها. ….والبنت محتاجة امها) مهما كانت الجدة حنينة بس الأم احن. ……بس انا خايفة أظلم لأن فى أمهات مش عارفة قيمة ضناها .بس انا شايفة أن الأم سلبية جدا وكان لازم تبقى مع بنتها لأخر لحظة.
قصة غريبة …..مش عارفة البنت حزينة علشان تعبها. …ولا علشان أمها مش معاها. …. الجدة فعلا كبيرة فى السن ومش قادرة تخدمها ازاى هتكمل معاها.
هو ايه معنى الأمومة؟. ….هو انا ممكن انام فى سريرى وابنى فى المستشفى بيتوجع ويتألم…..وانا عادى كده… …نفسى أجد لها عذر، نفسى اتعاطف معاها….رغم ما توقعته من افتراء على الأم بالرغم من كده مش قادرة أقف فى صفها……
_ هو فى حد اغلى من الضنى مهما كان_
أوجه كلامى لمين ….وازاى …..هو وانا ممكن احنن قلب أم على ضناها ؟. .ليه سيباها.؟ ..ازاى هانت عليكى. .؟نفسى أقولها انتى أقرب واحدة ليها لازم تبقى معاها فى محنتها مها كانت العواقب … صحة بنتك بالدنيا وحالتها النفسية أهم من العلاج …الدنيا مش هتحلى إلا بضحكتها….
تعالوا نبص على الحلو و الايجابى اللى فى الموضوع….
واحنا بنتكلم عن المستشفى.57357 …فجأة الجدة اخدها الحماس وقالتلى دى احسن مستشفى فى مصر وقعدت تدعى وتدعى لكل اللى اتبرع فيها وقالتلى انا ماملكشى غير الحلق اللى فى ودنى ده ولما اموت ولادى مش محتاجينه. وانا بعد “منه” ماتخف. ….لا…لا.. مش هقول كده أن شاء الله الجرعة التانية هكون بايعة الحلق وجيبة فلوسه هنا للمستشفى. …احساسها كان صادق قوى وكانت نبرات صوتها حزينة جدا….وبتتمنى الشفا لحفيدتها الغاليه …
حبايبي…. كلنا عندنا اللي نقدر نقدمه ونساعد بيه في شفا اطفالنا حتي لو كان أقل القليل…..جدة “منه” سبقت وعملت وعقبالنا كلنا
حبايبي.. خلوا أولادكم اول اهتماماتكم فهم اغلى ما فى حياتنا دقايق للطفل فى حضن (امه _ أبيه) لا يقدر بكنوز الدنيا فمابالكم اذا كان الطفل ده مريض كمان .
من اهم اساسيات التربيةالدعم النفسي للأطفال والأبناء_ لازم يحس انك فى ظهره وأنه قوى بيك .
__اللهم بارك لى ولكم فى أولادنا وارزقهم النجاح والفلاح والعافية فى الدنيا والآخرة
يارب فرج قريب
جيجي حافظ
التعليقات مغلقة.