حكاية ماكملتش .بقلم..سيد جعيتم
عدت سنين
ووراها سنين
ولسه الحنين
زي ما هوه
ما بيفوتنيش
ساكن قلوع الروح
ويايا فين ما أروح
ما بيسبنيش
ينوح مني .. يعاتبني
وريحه تهب تألمني
تغرقني
في بحر حزين
الزمان بطئ كسلان
ساعاته تقيلة
ما بتمرش
وانا هايم
مع الذكرى مع الاحلام
ترجعني لذاك اليوم
والكلمة المكسوفة
خارجه ملهوفة
ما قدرت اداريها
بحبك
اول كلمة حب .. سمعتيها
كانت بكر
حضنتيها.
بحبك
أول مرة اقولها لحد
ورغم كسوفك
اتولد الحب.. على كفوفك
والقلم كتب الحكاية
بداية مالها نهاية
واسمك منورها
بحبك
لونت خدودك
بلون الورد
وقلبك دق..دق ..دق
دق بجد
ودق القلب فاق الحد
اتاري القلب
لايف ع القلب
مستني إشارة حب
لضمنا للحب سبحة
حباية عنبر
والتانية ياقوت
وكريزه وحبة توت
وايد تتبطب على إيد
تعطرها بعطر جديد
وقناديل العشق تقيد
سهرانة تكحل عيون الليل
وتسبح بغنوة حب
نجمة هله
ووردة طله
بدل الضفاير
الشعر طاير
والقصة نازلة
فوق جبينك
والبق فاكهة
وعيون ملايكة
بصالي
بلعت ريقي
فتحت عيني
يا الله
البنت كبرت
وبنظرة قالت
من غير ما تنطق
انا . . بحبك
على شجرة عمري
جوه حلمي
حفرت اسمك
بنن عيني
في قلب قلبي
ورمشي فارس
بسيفه حارس
اسمك ورسمك
وبكلمة طايشة
جات من بعيد
خبر مكانش سعيد
بالصريح من غير تلميح
البنوته جالها نصيبها
ازاي
كانت معايا امبارح
لا جابت سيرة ..ولا قالت
وتاه الفكر تاه سارح
والكلام واجع وجارح
استعجلت
من غير ما أفكر
شوية واصبر
أو حتى اصرخ
بعتاب واعبر
قفلت بابي ورضيت عذابي
كنت صغير
وبين الأه والأه
حبل قصير
خيط عنكبوت
معشش جوه عقلي المتحير
صدقت … وما اتاكدت
وخناسي يوسوسلي
عايش ليها
وهُونت عليها
طاوعته
خرجني من الجنة
كانت يومها عايشة عيد
جات وعايزة تفرجني
فستانها الجديد وتفرحني
قالولها:
ما عارفين .. مابه
أتجن والخبل صابه
وبعد بعيد
مكانتش عارفة إللي اتقال
قالت كان بيتسلى
وانكسر جناحها
والحزن ملك قلبها الصغير
لعبت بينا الأيام
سنين كتير قدام
واتغربنا
بلاد تشيل وبلاد تحط
لا بينا سلام ولا أي كلام
ولا حتى خصام يقربنا
ونسيتي وأنت فاكرة
أن قلبي خان وباع
مع أني ميت
واسمي عايش
في الضياع
و انتي حية جوه مني
ومنين ما اروح
اشوف عيونك
طله دايمًا جوه حلمي
وما بين الحلم والحلم
كابوس يرجعني
ليوم كاساه الظلم
و موالي جراح يبكيني
وتبكي الناس لبكايا
فتردد الموال
التعليقات مغلقة.