حلاوة روح.. بقلم إيمان رضوان
وعديتلك كتيييير وأنت
مشوفتش مرة أحزاني
واقدملك سنين الفرح
وكنت القاسي والجاني
واقيدلك بين ضلوعي شمع
وانورلك ف أيامك
واطفي دموعي أنا وحدي
ولا حسيت بحرماني
خلاص مليت ومش فارقة
اكمل تاني والقاني
هعيش ايامي مع روحي
واحلي طريقي قدامي
وقول ما تقول أنا بايعة
ومش هندم ولا راجعة
مكنتش بعرف القسوة
وقلبك ياما وراني
يا ضي بعيد مبيقربش
واقرب منه مبيظهرش
يا جرح بأثره عاش فيا
مشوفتش مرة حنية
ملامحك حتي مش هيا
وكنت لقلبي نقطة ضعف
أنا اتحررت من قيدي
ولو صبري اللي فيه موتي
هعيش جرحي مع سكوتي
ولا ارجع تاني ليك اتزل
يا غلطة عمر قسماني
وذنب كبير ملوش تكفير
تدوب انفاسي بين أوجاع
وبوح يصعب عن التفسير
وضاع عمري ف غمضة عين
ويوم ورا يوم دبل وردي
ألم ف روحي جوايا
سنين بتعدي وأعدي
بقيت قشه ف مهب الريح
ف وسط الدنيا بتمرجح
الاقي الفرح اقربله
يفوت من جمبي يطوح
واعند زمني وأعافر
وأكمل زي طير مدبوح
يفوت الفجر استغفر
واتبسم حلاوة روح
واعدي الصعب رافعة الرس
ولا استسلم لأحزاني
شاعرة البحر
إيمان رضوان
التعليقات مغلقة.