حلمي اللي تايه…
فتحى نجم
حلمي اللي تايه
ــــــــــــــــــــــــــ
حلمي اللي تايه في السكك
لأيته راكن ع الرصيف
لونه مصفر وحزين
متشعلق علي رفوف الزمن
مستني دوره المخيف
أو انفراجه ولين
متشعطره الحروف
بين الحيطان الضيقه
جوا الحواري
محتاجه قعدة قريبه
في حضن النوادي والقهاوي
محتاجه ضمة كل منصف
وكل غاوي
محتاجه واقفه
ضد الأبالسه
وبتوع الجلا جلا والحاوي
واللي ناوي يقرب يضيف
اكتبوا الحرف الحلال
سمعوا كل العيال
شيء نضيف
اوعوا م الإسفاف
لتخنؤا كل الحنيف
اياكوا م التلقيط والنحت
لتصيبوا صبايا البلد
بعقم وخريف
اياكوا والتجريف
دا شيء سخيف
أهون عليا تاخد
حته من نفسي أو دراع
لكن حرف واحد
تبقي كتبت عليا ب الموت
والضياع
حرفي اللي ربيته
وتكون في حشا الليالي
سهرت علشانه
وسيبت كل غالي
ف تباً وألف تب
للي خان واللي باع
واللي بيجيب
في سيرة الناس
ع المشاع
واللي متربي ع الخطف
أصله كان في الأصل
جعان وجاع
وبيفرح للأوجاع
الحرف بتلم في قفف
ويجمعوه ب الزيف
والتوره منها ف لفف
ويقولوا عنها دا كيف
اوعوا تبيعوا الكلام
علي انه شيء ليكو
سيبو الحروف لصحابها
دا كله مكتوب عليكو
الكلمة بتسرسب
من تحت باط التاريخ
جايه بهدنه وسلام
جايه تطالب بحق
وشيء م النظام والإلتزام
صفارة من حنك عيل بريء
لسّاه بيحبي خطوته الأولي
محتاج يعيد عليكو
نصيحه أو شورى
عيدوا السيناريوا للورق
وانقذوا الحرف الغريق
رجعو للشط عِشبه
وسلسبيل ميته تبل الريق
حافظوا علي الأحلام
قبل م تتسرق
رمموا اللي باقي
واقروا عليها سورة الفلق
اردموا علي كل غث
وادهكوا
واظهروا كل اللي باقي
واضحكوا
بكل ود وبكل حب
راح تلاقي
إيد بتشد إيد
والموال يطلع فُجائي
دا الخضار اللي باقي
محتاج سواعد المخلصين
والحروف ماليا السواقي
شد حيلك إبدأ ب مين
دا العبير للي ساقي
وشهد الحروف بتغذي الطيبين
اهدوهم أو ابعدوهم
المشهد والله مهين
دا السم في الأفاعي
بخنق زهرة الياسمين
رجعوا العهد النضيف
جرنال أو كتاب قديم
قصة أديب أوشاعر مكين
حبة ورق متلعبيكن
بس مفهمش الضعيف
رغيف عيش بوش
سخن وسمين
عيدو الحروف الحلال
ابدرو الصفحات غِلال
رجعوا الشعر وانثروه
علي الأخضر والتلال
شجعوا كل حرف
هادف رزين
وابعدوا الأحمق والسخيف
قليل المرؤة والدين
لسَّاني بتشعبط
في ديل الأماني
لجل مابقىٰ شيء نضيف
بقلم/فتحى نجم
مايو 2022
التعليقات مغلقة.