حلم مسحول بـ قلم أسـمـاء الـبـيـطـار
كبرت البنت قدام عنيين أبوها و أمها
و إتخرجت من جامعتها و نسيوا لجل خاطر عيونها
كل ضيق
لما شافوا الفرحة جوه عنيها بتتنطط
و مش مصدقين إن الحلوة بنت عمرهم بقت عروسة
فاتحة دراعاتها للدنيا و مستنيه ترد الجميل
بتحلم بوظيفة زي باقي البنات
و توصل بشهادتها لأعلى المناصب و المقامات
و بعريس يحلي دنيتها و يخليها ست العرايس و الستات
لكن يا ألف خسارة
ما لحقش حلمها يشوف النور
و سحلوها بدم بااارد و زفر لجل شنطة فيها كام ملطوش !
و لفها أبوها في كفنها بدل ما يلبسها فستانها و طرحتها
و يشوف عيلها قبل ما يموت .
موتوه بالحيا الأندال
دوول خسارة فيهم عنيهم تشوف النور و لو ليوم
و لازم يكونوا عبرة لكل خسيس يفكر يقتل حلم كل أب و كل أم
ربوا عيالهم بشقى عمرهم و تعب الأيام و السنين .
صعب على أي أب يدفن حتة من روحه تحت التراب .
إحنا مش عايشين ف غابة
إحنا دولة قانون .
التعليقات مغلقة.