حلم يوسف… خاطرة بقلم سيد جعيتم
لما حلم يوسف مات
والسنين العجاف..ركزت
ولا يوم واحد منهم فات
الفتى مهران
شاف ضروع البقر ضربها الجفاف
و مية البير عكرت
مررت وغارت
وضحكات الصبايا بارت
والقوم صاروا سكارى
شخيرهم زي نعيق البوم
حذرهم
جاية ريح… حسوم
تعري نفوس البشر
تقلع جذور الشجر
خاف من اللي شاف
وبالربابة طاف
اصحوا يا أهل الكفور
بدلوا الضلمة نور
ما عادت تفيد الغناوي
ولا كلام الحكاوي
أصحوا بقى م النوم
هبه علينا ريح
حبلة بأذى.. وتباريح
تتلف حبوب التقاوي
وتبدر علينا مساوى
وأم الطرحة
تنده عليه…
يا ابن بطني
صحي الحلم من جديد
بعرقك.. هات لينا يا واد ..عيد
وهات قميص يوسف
فتح عيون ..عميت
واغرس بذور الحنطة
تطرح سنابل سمان
تملا خزاين العزيز
وتفيض … على الجيران
سيد جعيتم
جمهورية مصر العربية
التعليقات مغلقة.