حمام المقام أشرف الشناوى شاعر عاميه البرامون
برغم أن وشك
ملان بالبراءه
باشوفك ودايما
تسوقى العواقه
صاحبتى الا فندى
عشقتى الخواجه
وواخده فى وشك
قلوب الغلابه
كلابك تبرتع وتاكل
وتشبع
بحس الديابه
وتشكى الظروف
عمرى ماشوفتك
زى الخلايق شوية
حروف
باشوفك تملى
عروسه
فى مولد
وحضره ملانه
بفته وخروف
وناس من عرقها
بيدبل ورقها
فى اخر الكشوف
وتاكل عيدانها
وتفضل مكانها
فى اخر الصفوف
يشوفوا ابتسامتك
يحسوا بامان
ويسقوا اللى باقى
ولو عود ريحان
وريحة عرقهم
بتملا الغيطان
يدقوا الامانى
فى كل الموانى
عشان بس ضحكه
فينسوا إللى كان
وتغسل دموعهم
تراب السكايك
وترجع وشوشهم
دهب من سبايك
وترجع قلوبهم
مابين الضلوع
تدق برتابه وتسجد
خشوع
يصلوا فى مقامك
فيرجع حمامك
لضى الشموع
فيرجع حمامك
يطير عالربوع …………
التعليقات مغلقة.