خايف من ايه…شعر أشرف الشناوي

٠خايف من ايه…شعر أشرف الشناوي

خايف
من ايه
دا انا قلبى
عبيط
وضحكت عليه
ماهو كان
مرتاح
ولا شوق وجراح
ولا بات سهران
بيفكر ليه
حبك وداه
فى السكه وتاه
وازاى ينساه
من بعد هواه
خايف
من ايه
دا انا قلبى
عبيط
والبحر غويط
ومالوش مجداف
علشان خواف
من نظرة
عين
ورموش خطين
اخدوه الاتنين
م الدار للنار
سلم واحتار
خايف
من ايه
دا انا قلبى عبيط
زى العصفور
عاشق للنور
ويموت م السجن
ان كان بنور
عاشق لبراح الكون
والدور
يفرد فى جناح
ويضم جناح
سواح
فى بلاد الله
لله
خايف
من ايه
دا انا قلبى عبيط
والناس فاكراه
مكار وحويط
مع انه
بسيط
بيخاف م الهوا
وخيال الغيط
ويخاف
لو شاف
يوم صياده
وصباعه بيلعب
فى زناده
خايف
من ايه
دا انا قلبى عبيط
رغم عناده
ماطرح ماطروح
تلقاه مفتوح
كل أبوابه
لو شاف فى عينيك
دمع يهاتى
يعملك مطرب
والاتى
من سيكا لصب
لبياتى
خايف من ايه
مانا قلبى عبيط
وانت حياتى …………….

اشرف الشناوى
شاعر عاميه
البرامون