خبطت ليه؟.. بقلم منى عبد الرحمن
قلبي اللي نايم من زمان
جاي انت يعني تُزْغُدُه وتْزُق فيه
أهو فاق وِرَدْ
عملت إيه
سِيِبْتُه وجِرِيت
ولأعلى حِتَّه ف الزمن
تَوِّهْت روحه ف الدقايق والساعات
مبقاش يِبَات
من غير مايسمع لحن صوتك يِتْبَعَك
من غير حكاياتك معاه
مبسوط كده؟!
أهو ضاع وتاه
مش لاَحْقَه احس بِدَقَدقاته ف الضلوع
ولاقادرة أعرف هو مات أو فيه رجوع
عمال بيبكي جوه روحه وجع وجوع
كان فيها إيه؟
لو سيبته نايم ولامَيِّت ولاف الأحلام سَرَح
كات حالته أبسط من كده
كان جرحه أهون من كده
كان عمره ضايع بين برود
ومابين مَرَح
ولاكان يحس بِدَقِّتُه أو نَبْضِتُه
غير لما يعني من الوجع كان ينجرح
خَبَّطْت ليه؟
ماكنت سيبته ف عِلْبِتُه
خَبَّطْت ليه؟
غاوي تِقَطَّع بالفراق ليه سِكِّتُه
خَبَّطْت ليه؟
وبِعِدت فوق
في أعلى حتة ف الزمن
واقف بتتفرج هناك
من جنب جسر الاشتياق
وياك أنا مش فارقة شئ
غير انك انت وف الحقيق
عذبت قلبي وخُضْت فيه
منى عبد الرحمن
التعليقات مغلقة.