ختم النسر قصة قصيرة بقلم رضا يونس

ختم النسر قصة قصيرة بقلم رضا يونس

جاءه صوته دافئا :
حضرتك الأستاذ طارق محمد العيدروس؟
طارق: أيوة يا افندم أنا طارق العيدروس ..مين حضرتك؟
المهاتف : أنا إبراهيم المليجي.
طارق : تحت أمرك يا أستاذ إبراهيم ..
إبراهيم : حضرتك كنت مقدم ملف لوظيفة مهندس نظافة حي شرق ؟
طارق وقد بدا عليه أنه على وشك استقبال خبر قبوله في الوظيفة التي تقدم للحصول عليها : أيوة أنا أنا يا افندم ..
إبراهيم : المظروف اللي حضرتك كنت مقدمة لونه أصفر من الحجم الكبير ؟
طارق: بالظبط يا أفندم..
إبراهيم : كان على غلاف المظروف طوابع بريدية بقيمة ١٧٠ جنيه و٣٥ قرش ؟
طارق: ماشاء الله يا افندم …حضرتك مركز أوي. وبتدور في التفاصيل..
إبراهيم : عنوان حضرتك..المقاطعة ..السنبلاوين ..دقهلية ..
طارق :تمام يا افندم و لو عنواني مش. عاجب حضرتك أو فيه مشكلة أغيره. أغيره يا افندم.
إبراهيم : المظروف من قدام عليه ١٧ ختم شعار جمهورية و١٣ختم بيضاوي و٣٧ توقيع بأكتر من لون ؟
طارق: ايه داااا يا افندم ده!!!ماشاء الله ع حضرتك!!! فيه كده ؟ قمة الدقة يا افندم ..النظافة في أيد أمينة فعلاااا .
إبراهيم : المظروف من الداخل فيه خمسين ورقة صورة طبق الأصل لشهاداتك ومعتمدة من جهات حكومية وموثقة من الشهر العقاري و الخارجية، موجود كمان رزمة ورق أبيض A4 وورق مسطر و٦ افرخ كربون؟
طارق: إي دااا بقا يا افندم ..معقول أنتم فليتوا كل ذرة في الملف . . والله كنت خايف من الغول اللي اسمه الواسطة.. الحمدلله ، الحمدلله فعلا البلد بتتغير .. آجي امتى بقه حضرتك استلم الوظيفة ؟
إبراهيم : وظيفة ايه يا أستاذ . أنا زبال الحي لاقيت مظروفك في صندوق الزبالة فتحته لاقيت فيه ١٢ صورة شخصية قلت اعمل فيك ثواب يمكن تحتاجها في الوظيفة اللي بعدها ..