خطوط للسير شعر / وحيد علي الجمال
كتبت في دفتر الأحلام
خطوط للسير مهيش ليا
وكان معظمها لو تعرف
حقيقي بتبقى وهميه
وكان مطلوب بيان حاله
لقلب بيعشق الحاله
وأصل حبيبته جِنْيِّه
بتسحر قلبه .. محتاله
بيعمل م الفسيخ شربات
ويعرف يمشي ع الميه
قصيدته مش كلام وخلاص
ولا مكتوبه كده عادي
ولا بيحكي كلام فاضي
في لحظة يكشف المستور
ويبقى في القانون دستور
وممكن في الهوى قاضي
وممكن فيه بيتعادىٰ وبيعادي
وبيّلَمْح وبيّصَرْح
على خاطرُه اللي متكسر
وجرحُه شارخ الصورة
تملي ف رفضها يشطح
قصيدة ف صدره
محشورة ومخنوقه
من الجرح اللي كان واقف
على المسرح
وكل الناس لها وادي
وهو لوحدُه في وادي
اذا اتْعَدوا على ديوانه
وسرقوا حلمه وجنانه
يقيم الليل كدا مكشر
بيوصف وَضْعُه ومآلُه
ويشرح قد ما يشرح
يشيل الهم مع غيره
يلاقي الرد من جرحُه
مفيش واحد ف دنيتنا
يبيع حلمه وتفسيره
ويهدي للغريب فَرْحُه
قصيدته بتوصف الجنة
وان الحب مش مِنَّه
ومهما الطيبه تتحنى
شجرها عمرُه ما يطرح
وحلمك دايره مقفوله
فمَتْوهشي بقى وتسرح
حقيقتك باينه في الصورة
ملكشي في الهوى مطروح
التعليقات مغلقة.