خط النُص…
بقلم وحيد علي الجمال
(خط النُص)
و طول عمري بحب العب
في خط النص
مانيش حريف و لا بعرف
أنط و أباصي و لا أتحرك
بلمسة تخض
و لا عمري عملت سيروه
و لا أسست
و سهل كتير
إذا شوفت الهجوم كابس
أسيب الماتش
وإن الفرقة من غيري
و في غيابي تتوه و تضيع
ومين غيري يحط التاتش
و صعب كتير
أموت واقف و لا اتحركش
فقلت ألعب بقى تحليل
و ارص الحرف جنب الحرف
و أقول في الحب و اتمعشق بأبياتي
واطلع م الصبا نهاوند
و أقول للمزه أبياتي
تقف ثابت ماتتحركش
قصيدتي فيها كام غمزة و تسبيله
تخليني اعيش طاير في قلب الحب
قالولي مش كفايه تكون
مع أهل الهوى مجنون
تاريخ الرفض في عروقك
مهوش مختوم و لا معروف
و كل شروطه معروفة
تبدل جلدك الحلوف
يكون حساس
و تبقى في الهموم مكروف
تعيش تهميش تموت تهميش
تكون واحد من الحرافيش
و لازم تمشي في الضلمة
و معصوبة عينيك الاثنين
و ما تخافشي من الخضه
و ترجع عكس أوجاعك
على جته لها وشين
هتقدر تقتل الحاوي
و تسرقلك جناح واحد من الجناحين
تخش مغارة الخفافيش
تداري وشك المقطوع على كتفك
و متعلق في قلب الهيش
تقابل أمنا الغوله
مع شوية من المهابيش
و تقطع رأسها بحروفك
و تعمل فيها متغرب
و تطوح كما الدرويش
و تفرد حبل أفكارك
و تمشي تلعن التهميش
تعلق صورتك الهبله
في وسط ميدان
مهوش واخد على الطرابيش
توزع عمرك الباقي على الكواليس
تسقف و أنت بتمرجح
سنين عمرك في قلب النيش
و تضحك وأنت بتعيط
على كدبك مع التخريف
و تلعن كل أفكارك
و مش لاقي رغيف العيش
نصيحتي لك بجد حقيقي ماتكملش
و متألفش
ولا لك حل غير إنك تروح تلعب
و من تاني في خط النص
وحيد علي الجمال سرس الليان محافظة المنوفية جمهورية مصر العربية
التعليقات مغلقة.