خلى بالك…بقلم أشرف الشناوى شاعر عاميه البرامون المنصوره
دق مية ترباس فى بابك
واوعى تعتب حد عابك
واللى حبك حبه اكتر
وادى ليه تلتين منابك
واللى سابك وقت ضيقه
اوعى تزعل لو دقيقه
واللى شالك مره شيله
واللى كسرك
اوعى ترجع وتناديله
واللى ساندك اسنده
يعنى لو مال غصب عنه
غصب عنك تعدله
الحياه دى المدرسه
والزمن هو المدير
واوعى تزعل لو وقعت
المهم تقوم قوى
واوعى يوم رغم المحن
تنكسر او تتلوى
خلى حلمك تحت باطك
دارى جوا عينيك عياطك
واوعى حد يحس وجعك
مهما كان الجرح جامد
اكبسه ببن الامانى
وان فى يوم زادت دموعك
قولهم دى من الاغانى
بكره يجى الفجر شايل
صبح بيرد الجمايل
بكره تلقى الضحكه طله
م الجراح زى المظله
تحمى راسك م اللى هايل
واللى ايل للسقوط
يعنى لو بطلت تحلم
يبقى احسنلك
تموت …………………….
التعليقات مغلقة.