خمستاشر سنة
سعاد الزامك
أيوة يا عمري
لسايا خمستاشر سنة
سنين تموت و جراح تفوت
و لسه بأدور ع الهنا
نفس الملامح و نفس القوام
و أسأل تملي مين أنا
ما أنت عارفني
وأكتر كمان مني أنا
لا بحب مال و لا الكلام
من وقت ما دوقنا سوا
معنى الغرام ، طعم الهنا
جافيت كتير و نسيت كتير
إلا هواك و الجدعنة
لو حتى مَرّ مليون سنة
حــ أفضل أنا
زي ما أنا
لسايا بأزرع خير
في سنين الغلابة
و أروي حنين غُربتي بسمتي و غُنايا
و أخَضّر عيون المحرومين
رغم وحدتي و شقايا
ما ألاقي منهم إلا الديابة
مستنين ينهشوا عمري و صِبايا
ما أحصدش إلا دمعتي و أسايا
أخبز خبيز الصبر
في ضلوع بتكويني
و أستنى يوم الفرح
و ما يجيني
أصبر كمان و كمان
أستنى خارجتي و عزايا
و لسايا برضه زي ما أنا
واقفة لسه قدام المرآيا
الضحكة سارحة فوق الشفايف
و القلب لساه حيران و خايف
و سؤال غريب و فكرة طايشة
لحد إمتى سكوتي هوا .. حِمايا
اتشققت مني ملامحي
و اتبدلت كل معالمي
حتى اسمي
بيستخبى جوة قلبي
أضحك أنا ، و أبكي أنا
و أصرخ بأعلى ما فيا
ليه يا عمري وقفت
عند خمستاشر سنة
التعليقات مغلقة.