خير الأمور الوسط ..
قلم / أسـمـاء الـبـيـطـار
كتير مننا بيبقى ماشي في الدُنيا بدون هدف واضح بيخبط في الدُنيا و الدُنيا بتخبط فيه بالبلدي زي ما بنقول .
كتير بنبقي عارفين إن نهاية الطريق اللي ماشيين فيه حيطة سد و مُصرين نكمل للأخر
بس للأسف بنكمل على حساب عُمر رايح ووقت و جهد و نفسية
يمكن نخرج بيها مدمره .
و كلمة يا ريت وقتها مش هترجع حاجة و مش هيفيد ندم .
مش عيب إننا نقف في وسط الطريق
نقف وقفه صح مع نفسنا و نعيد حساباتنا من جديد اياً كان الموضوع
و أياً ما كانت النتيجة .
ما نقدرش نمنع البدايات و إن كانت دي بالذات ليا تحفظ عليها
فلو تسمحوا لي بوجهة نظري المتواضعه فيها ..
في أي بداية حاجة اسمها شواهد و معطيات و نظرة و قبل كل دوول في حاجة اسمها ” راحة قلب “
كتير بيبقى قلبهم مش مرتاح للشئ من اول نظرة بس بيعاند و يقول
ما ” يمكن “
ما يمكن دي لوحدها بتسلب اي إرادة في أخذ اي قرار و بيقرر يمشي الطريق للنهاية و لكن للأسف اغلب النهايات سلبية و لكي نكون مُنصفين إلا ما ندر .
نرجع لموضعنا كنا بنقول مش عيب نقف في وسط الطريق
و نشوف حققنا ايه .
نشوف دوسنا على نفسنا كام مره علشان حتى نقدر نوصل لنص الطريق .
نشوف باقي طاقة فينا اد ايه و هنقدر نكمل ولّه لأ
و إذا كملنا في نتيجة .
كتير من الأسئلة اللي لازم تجاوب عليها بنفسك لأنها حياتك
و عُمرك و صحتك لازم تكون واضح وضوح الشمس .
و ديماً كنا نسمع مقولة إحمد ربنا إنك لسه على البر .
هو دا الغرض البر دائماً فيه فرصة للنجاة و لو باللي باقي من العُمر .
التعليقات مغلقة.