دلوعة العيلة.بقلم.زينب سليم
البت الحلوة … الدلوعة
اللي بتهتم … بمظهرها
دايما تتكلم … بميوعة
وتحب الكل …. يقدرها
لما بتتمختر فــ الحارة
وكأنها هيفا ….. وديانا
على وشها بويا ومحارة
عاملالنا كيوتة وسهتانة
كلمتها .. عاوزة تمشيها
والكل بيسمع ويطيعها
لابيقدر حد … يمشيها
ولا هيبة أب … بتفزعها
دلوعة العيلة من يومها
اصل وحيدة بابا وماما
وتملي مش طايقة هدومها
واللي يزعلها …. ياندامة
ولاحد طايقها فــ الحته
لو فكر واحد …. يتقدم
بتسم له بدنه … والجته
يكره نفسه …. وبيتندم
وتبص لغيرها … بتعالي
لو ايد اتمدت يوم ليها
دلوقتي … ولقبها الحالي
البت العانس …. معاليها
وجمالها راح ويا شبابها
ولا عاد فيه حد بيتقدم
بعد م راحوا كل احبابها
عايشة وحيدة وبتتندم
التعليقات مغلقة، ولكن تركبكس وبينغبكس مفتوحة.