دليلك مات شعر وحيدعلى الجمال سرس الليان محافظة المنوفية جمهورية مصر العربية
صدر حكمك على نفسك بنسيانك
وتسليمك لأحزانك بلا ديه
وكان رافض يبرر كل افعالك
دليلك كان واقف ضدك
وكان اثبات على خيبتك
عاوز تثبت من الآخر
بإنك كنت في الآخر
ضحية لمين؟
مانيش عارف
وليه صدقت تفسيرك
وجيت باللوم على غيرك
ورافض أي حد يكون
واخد عكسك في تأويلك
ماهو انت لما كان سَبّتَك
على كفوفك ماقدمتوش
ماتزعلشي على حَدَّك
اذا عدى وملحقتوش
فمتعومشي على عومك
وتتصور كأن الكل كان خانك
وباع عهدك وأعذارك
وبات قابض على النيه
ونفس الجرح كان واخد
على حضورك رقم 100
لأن الكل في غيابك
رفض يعمل لحكمك الف شماعه
مدام حالتك في نسيانك
بقى رأفة وحنية
وطيري لما طار عندك
نتف ريشُه
وكان حضنك على عِشُّه
ملوش غيرك كدا غيه
انا دوري على المسرح
خلاص خلصتُه لحسابك
انا فاصل ما بين خطين
ما بين حلمين
ما بين عمرين
ولما وصلت لعينيها
ماشفتش حاجه بعينيه
هاقولك ايه على حالي
اذا قلبك عشق مرة
ودون الخَلق جِنَّيه
ماهو شكلي ماهوش ساحر
ولا كنتش في يوم مجنون
وعارف دوري انا كويس
وحافظُه حتى بالملي
في يوم العرض..
رفض قلبي يكون موجود
وكان واخد قرار حاسم
بإن المركب المكسور
لا يمكن تمشي على الميه
انا شايفُه هناك في الدور
ومستني يعدي جوه أحلامك
سحب نفسه كأنه مجاش
خلاص خِلّصِت كدا حكايتك
خلاص يابني..
ماتتعبناش بقىٰ بوهمك
وتتصور حاجات مكانتش في حسابك
رصيدك في الحياه عندي بقي صفريين
ماتلعبشي في أوراقك
ماعدشي في قصتي حاجة لها وشين
دليلك مات
التعليقات مغلقة.