دموع حيَّه…يا لابسة ألف جلابيه بقلم حسن أبو عرب
وقادره تحبي ياقادره
وبتقولى الهوى غلاب
وقادره تدارى فعلَاتِك
وترمى عليا لوم وعتاب
يا ناسيه لكل زلاتك
شبعت خلاص ضنا وعذاب
يابخه السم ف وريدى
ولفه احبال على چيدى
وسده ف وشى مليون باب
ياغادره وفارده لقلوعك
ياطافيه الضى انا شموعك
يحن القلب لرجوعك
سراب يخدعنى بدمو عك
والاقى الدنيا غيم وضباب
وفين حلمِك
وفين سِلمِك
ضحايا بتبكى من ظُلمِك
ومين ظَلَمِك
ياحلم وللأسف كداب
وجايَه تشتكى همِّك
يادمى الجارى فى دمِّك
دا كلِّ اللى سكن يَمِّك
بيشرب من نيران يمِّك
ياحيه وليها ألفين ناب
ركِبت الشُوق معديَّه
وهبت الروح ليكى هديه
غلبت معاكى مداديه
يالابسه ألف جلابيه
وقتلانى بدون أسباب
راح ادعى عليكى من غُلبِى
و من قلبى
م انا الدرويش
دعائى مجاب
التعليقات مغلقة.