دم القصيدة…شعر وحيد علي الجمال
حللوا دم القصيدة
واعملوا لها مسح ذري
شوفوا جوجل أو تويتر
حرروا محضر تحري
سجلوها صفحة بيضة
واكتبوها باسم غاندي
قلبوا الفيس اللي فاضل
يمكن اتعرف عليها
مش بعيد قلبي يساعدني
والحنين يرميه في صدري
أبقى مثواها الأخير
أو كابوس مسكون بجني
هتلاقولها معجبين
بالعدد 100 أب شرعي
لو فشلتوا في الطريقة
سجلوها لأي شاعر
في الكتابة حرفه بارع
تبقى بنت بنات مشاعره
بالنسب أو بالتبني
دمها دم افتراضي
مش شبه شريان ديواني
والفصيلة غير فاصلتي
في الوجع تشبه وجيعتي
حرفها متربي عندي
بس مش واخد ملامحي
له بلاغة وله شفاعة
مستحيل ينكرها قلبي
لو هيخسر بحر هالك
جوه عالم وزنه فالت
السطور بركت وشالت
من دموعها ألف معني
كل بيت في حيطانها شاهد
عشقي عمره ماكان محايد
أو بيشبع م القصايد
صدقي كذب وكدبي صدق
القصيدة ناقصة حضن
واخده مني بوز وركن
ناشفة جدا زي سجن
بتحاسبني وتعاتبني
ع اللي ضاع من عمر سني
القصيدة بنت عمري
مش لقيطة أو واخدها بالتبني
في الأساس مخلوقة مني
ببقى فيها مش طبيعي أو ملاك
صرخة عالية من لهيب الذكريات
طالعة صافية من دبيب نبض السكات ؟
القصيدة ناقصة حاجة لا حاجات
القصيدة لسانها زالف
غلطة واحدة هتلاقيك
في الكود مخالف
بايعة سرك حافظة شكلك
مش بتستر حتى جرحك
رافضة تفضل في الوصاية
تحت أمرك
حتى لو عاشت حياتها
فوق دموع الذكريات
التعليقات مغلقة.