دم الوريد بيشر …
جابر الأسد
دم الوريد بيشر
باعوا الولاد الإتنين
الحال صبح مايسر
والدمع بان في العين
باعوا النفيس والحُر
بخيانة يا فلسطين 🇵🇸
وازاي نقول تحرير
والقلب مش خالص
مابين جاسوس ولعين
مافيش ولاء خالص
وكأننا ملاعين
… في القلب يا فلسطين
مهما حصل ليكي
غنوة في قلب حزين
نَبُضُه بيِنعِيكي
كل العرب شاهدين
لحد إمتى وفين
الجرح يبقى دفين
بيموت شباب فيكي
عربية يا فلسطين
ولَّا العقول تاهت؟
ربطوا وشلوا إيدين
والآهه مكتومة
عربية يا فلسطين
وأنا آهتي مسلوبة
أخرس باشوف بالعين
تحمي الديار طوبة
عربية يا فلسطين
والكل بيقولها
في كل وقت وحين
والقدس منكوبة
مع إنهم ساكتين
ما تقولشي سبوبة؟؟
ياربنا يا معين
انت المعين في عُلاك
القدس ملّ أنين
برحمتك في سماك
ابعت صلاح الدين
يصحصح الأموات
عربية يا فلسطين
لسه اللي جاي حكايات
جابر اﻷسد
التعليقات مغلقة.