دنيا غريبه…
شعر السيد الشيتي
غريب بشوف الأماكن
والبشر “ديكورات”
ووشوش بتضحك
وساكن ف القلوب آهات
وعيون تشوفها بتغزل
م الألم حكايات
وناس حياتها بتشبه
ناس كتير اموات
وناس بتمشى ف جنازه
تبكى على ال فات
وناس قلوبها ف اجازه
عايشه لحب الذات
وقلوب مابينها وببن
حب البشر مسافات
وناس بتضحك ولون الحزن
منقوش ع الوشوش
مسروقه من نفسها
عايشه ف وسط وحوش
والهم هاجم ع البيوت
زي الجيوش
بنفرح لو نلاقى
حد وشه بشوش
وادينا عايشين
وايامنا تسلمنا لبعضيها
ف بحر الموجه فيه عاليه
وبنحاول نعديها
وناس رايحه وناس جايه
وناس عايشه ف ماضيها
وناس فاكره وناس ناكره
وناس الفرح ناسيها
التعليقات مغلقة.