دَروِيشْ…كلمات أبومازن عبدالكافي

كِتِر الْعِتَابْ ..
كِتِر الْمَلَامْ ..
طارِ الْحَمَامْ ..
شَقِّ الغَمَامْ
وِفَاتْ الْعِشّْ ..
مِنْ غُلبُهْ

خِلِصِ الْكَلَامْ
والصَّمْت خَيِّمْ ..
عَ الْمَكَانْ!
تَاهْ الْوَلِيفْ ..
مِنْ يومْ مَا فَاتْ
وِسط الْجُمُوع ..
سِربُهْ

بَقَى مِشْ حَرامْ ؟!
يِبقَى الْعزيزْ ..
ابنِ الْكِرامْ ..
دَروِيشْ ..
وهايمْ في المَقام ..
بِيغَنِّي ..
مِنْ كَربُهْ !

لِبسِ ..
الْجَلالِيبْ وِالسِّبَح
واتخَفَّى وِسطِ النَّاسْ
وِيعَلِّي صوتُه ..
ب “مَدَااااد”
يِتهَزِّ لِه الْحُرَّاسْ
وِيِصِيح ..
بِقُولةْ “حَيْ ي ي”
دِي سلَاحُه ..
في حَربُه

الْكُلّْ في حَضْرِتُهْ ..
خُدَّامْ وِطوع أمْرُه
بيقُولُوا ..
لهْ كرامَاتْ ..
وِيْقَدِّمُوا قَرَابِينْ
عَلَشَانْ يِنُولُوا الرِّضا
وِبِيِدفَعُوا ألُوفَاتْ!
حتَّى اللي ..
بِيْحَاربُه !

سِيدنَا الْوَلي..
شَارِد يُومَاتي في الزِّحَامْ
مَارِد وِكَابِتْ قِوِّتُهْ
تَحتِ الرُّكامْ
فَارِد قُلُوع الدَّروَشَةْ
بِيْعَاني ..
في تَجَارْبُه

15/8/2023m