ذاكرة الأسماك …
رضا أبو الغيط
ذاكرة الأسماك
السلحفاة
اتعلمت
ترقص على
بحر الرجز
بعد ما كانت
ف الحياة المُظلمة
رمز الكآبة والعجز
شافها السمك
من فرحته
جاب طبلته
غنى ورقص
ودموع عينيه
نسيت أوام
أحلام صديقه اللي هلك
لما ف يوم فكر يشوف
السلحفاة
راكبة الفرس
لما غواه فكره العقيم
يرفع ثياب السلحفاة
ويشوف فيه ايه تحت المَلس !
لما اتهرس حلمه النحيف
بين المساوئ والهوس
وف لحظة تاه عقل السمك
مع هز وسط السلحفاة
على صوت تفاعيل الرجز
وقال بشوق
أنا هبني بيت فوق الرمال
يجمع ما بين
قلبي اللي مال والسلحفاة
وابقى الأمير على قلبها
من غير بنادق أو حرس
والماية من خوفها على
مخلوق ضعيف
بيبات ليلاتي ف حضنها
واقفة بتصرخ م الألم
وف ايدها ميت مليون جرس
وتنادي : ارجع ياغبي
بطل هرج
خليك ف بحرك واحترس
ليكون شبك
وتموت وحيد
على شط صاب أهله الخرس
رضا أبوالغيط
التعليقات مغلقة.