ذكرى الألم
بقلم أبوشمس سالم
عيني عليك ياجدع
قلبي من الحُزن إتوجع
مين دي اللي ماتت دلني
مين هيه وجعك هزني
حُزنك غريب وجعك عجيب
وناس كتير مشهد رهيب
صحّيت في قلبي ميت وجع
صحيت حنان مني اتمنع
أمي اللي كانت هيه عمري.
ونور طريقي وحلم أملي
كان بُعدي عنها غصب عني
وكأني بعدها تُهت مني
كان يوم طويل ملوش نهايه
هحكيلكو قصته من البداية
تليفوني رن الصبح بدري
رقمها كان مكتوب بإسمي
وفجأه صوت غريب بيبكي
وصوت دموعه عنه تحكي
وقالي كلمه بصوت حزين
ومقلش حتى هو مين
رج خوفي نبض قلبي
وصرخت فيه..أمي فين؟
طمني قولي.. انته مين؟
وفجأه صوت دموعه زاد
وقالي يابني ملوش ميعاد
كان نفسها امبارح تشوفك
أو حتى تسمع بس صوتك
بس طمن يابني قلبك
هيه ماتت راضيه عنك
وعنيها فاضت بالدموع
لما مسكت إيدها صورتك
وقالتلي لما تشوفه قوله
إن كان واحشها حضنك
ساعتها قلبي إتخلع.
من بين ضلوعي من الوجع
هيه دي نهاية الحكاية
وقلبي من يومها اتنزع.
جنازة ذكرتني بوالدتي رحمه الله عليها
التعليقات مغلقة.