ذكرياتي مع أبويا ف عيد العُمال
بـ قلم / أسـمـاء الـبـيـطـار
إنهاردة أول مايو .. يعني عيد العُمال
اولاً .. كل عام و عمال مصر الشرفاء بألف خير و صحة و نشاط .
بدأت معرفتي بعيد العُمال من يوم 21 مارس يوم عيد الأم .
لما كنا نتلف حوالين أمي و جايبين لها الهدايا ، و إحنا صُغيرين
لقيت أبويا بهزاره المعهود ، قالي ما إحنا لينا عيد إحنا كمان .
كنت لسه صغيرة و مش فاهمة ?
قالي : أول مايو عيد العُمال .
مش عارفة ساعتها مع إني كنت صغيرة حسيت ب إحساس مش عارفة اوصفه !
هي مش حكاية هدايا ، لكن التقدير من أقرب الناس ليك بيبقى ليه طعم تاني .
و من وقتها و كل عام في عيد العمال كنت بجيب لأبويا الله يرحمه هدية ازازة كولونيا ،، و دستة مناديل .
ياااااه كان بيبقى فرحان جداً و كأني جايبة ليه الدُنيا بحالها .
و بقيت كل عام على دا الحال ، و يقولي إنتي الوحيدة إللي فكراني
مع إن الدولة كلها فكراه ، لكن زي ما قولت لكم التقدير من أقرب الناس ليه معزه خاصة و طعم تاني ..
فرحوا أباءكم ، بهدية بسيطة ، بكلمة طيبة ، و لو بأكله حلوة تتلموا عليها ، و تعرفوه إنكم مقدرين تعبه علشانكم أد اييييه هيبقى فرحان ، و هتسروا قلبه و خاطره ، و يمكن ينسى تعبه و طحنته طول الوقت
و هتبقى ذكرى حلوة ليه و ليكم ..
و كل عام و كل عامل في كل مكان بألف خير و صحة و سلام .
التعليقات مغلقة.