رباعيات الفضيل … بقلم الشاعر محمد عبد الفضيل
الندل لو يوم تصاحبه
هتعر أهلك وناسك
الحر حايله وصحبه
والندل دوسه بمداسك
وعجبي
صاحب أصيل تلقي وده
ضلل عليك في المصاطب
والندل سيبه ورده
دا مفيش وراه غير مصايب
وعجبي
صاحب عزيز صان لنفسه
عز و كرامة رجال
عمره ما بيذل نفسه
لو ضاق عليه ألف حال
وعجبي
يا صاحبي أوعاك تبعني
كده مهما يحصل ما بينا
وجعك دا برضه واجعني
والهم مقسوم ما بينا
وعجبي
فيه صحبة في الدنيا نعمة
زانت صحابها وزانوها
دا اللي ما بيشوفها أعمي
كل الخلايق شافوها
وعجبي
السكة واعرة وطويلة
ليلها مكحل رموشه
لكن ما باليد حيلة
الندل مين راح يحوشه
وعجبي
وزنو ا الرجولة ما وفوا
ولا خصلة يوم من خصالها
كل اللي قالوا ما كفوا
والكفة معووج ميزانها
وعجبي
التعليقات مغلقة.