رجعوا الشمس اللي راحت .. شعر/ أشرف الشناوي
علمونا
في المدارس
الانجليزي
شئ اساسي
قالوا يعني الدين
دا عربي مش اساسي
حنطونا عالكراسي
قالوا مسيو
ومره تيتشر
والثقافه حدانا تكتر
واللي يرطم باللاتيني
يبقى أكبر
توهونا في المراحل
غيروا شكل المناهج
لونوا حتى التاريخ
زودوا حصص الطبيخ
الحضاره قالوا عنها
انها زي الفسيخ
سلمونا من رقابنا
للمسيخ
والعباقره سلسلوهم
من ايديهم بالروتين
حبه طفشوا
واللي باقي في العجين
واللي يحلم في البلد دي
يبقى زى الطبالين
رجعوا الشمس اللي راحت
من ايدينا من سنيين
علموهم ان دينهم
شئ اساسي
وابن سينا والمعري
وابن هيثم دول مراسي
علموا العالم دا كله
لما كانوا في يوم مواشي
علمونا العربي تاني
رجعونا للطابور
والتحيه والنشيد
مش هاتلقوا فينا واحد
يوم غبي او يوم بليد
كسروا الطوق الحديد
يرجع العصفور لعشه
ويبتدي غناه من جديد
…………………
اشرف الشناوي
شاعر عاميه
البرامون
المنصوره
التعليقات مغلقة، ولكن تركبكس وبينغبكس مفتوحة.