ردي يامه وريحيني.بقلم.معوض حلمي
وقعدت أخاطب عقلها
يمكن آلاقي دليل ياخدني لقلبها
لقيتها محتاجه الدفا، .. والخوف جبان
ولقيت حرس واقفين على كل البيبان
منعوا اللقا وانا اللي دافع مهرها ..
فدان عرق وسنين شقى
مانعين خيوط الفجر تطلع شقشقه
وحبيبتي عاشقه الغلبانين
والعطشانين حب وقبل
بالليل باشوفها ملثمه
جوا الحواري المعتمه
بتلف تخطب ودهم شايله الدبل
مالهاش في أدوار الهبل
علشان صريحه وممتعه ..
بتهد كل الاقنعه ..
كل التيجان اللامعه وكل البدل
دلوقتي ليه ممنوعه تحكي
ممنوعه ليه ويايا تشكي
سابوني للأوهـام وشـكِّي
ناديت عليكي م الميـدان
سدوا الفضا بالصولجان!
قالوا حرام الفضفضه وطولة اللسان
وانا الحبيب اللي اتعمل للخلق ميس
بازرع فواكه للبشر وآكل دريس
والهم شايله ع الكتاف ومفيش ونيس
فين السبل يا إيزيس ..
فضيت خلاص كل الحواصل
لمي الرفات من أزوريس ..
دا معادش خير ياحبيبة واصل
إبنك معادش خلاص بيطير
حورس إله الطير خلاص..
مجروح جناحه اتلوى
وانتي الدوا قبل العَشا ..
وانتي النفير
وانتي الهوا بعد العِشا ..
وانتي السمير
من فضل خيرك حضرتك..
صحي الضمير
وانا بسألك ..
إنتي ليه بتعكي عك
رميتي زهرك طالبه شيش..
جه دُو و يك ؟!
طَب دايره ليه حوالينا لك!
هو انتي إيه جايبانا شك!
دا احنا العيال الطيبين ..
فاتحين بيبان الدار حنين
ومنزلين الدمعه دم ..
هو انتي أم ؟!
والا انتِ ضُره وناويه غم ؟!
ساعات باشوفك أبَّهه زي المها
ماشيه الخطاوي بعزها
وساعات باشوفك زي مريم
صحيح بتول فيكي الملامح آمنه
وملونه كل الفصول
وساعات باشوفك زي غول
صابني الذهول!
ضحكتك ماعرفش ليا أو عليا
نظرتك كانت نديه
وكنتي حضن للهفتي وإيدين عفيه
سقتيني ليه مرك وجورك
رمتيني بالبهتان وزورك
وليه سهامك صايبه بتشق اللي فيا
وانا لسه نية تقوم عفية وحارسه دورك
ردي يامه وريحيني
ليه شفاعتك ع الصراط ممنوعه عني
وليه بدمي ياحبيبتي بتستحمي
وليه بهجرك تدبحيني
ردي يامه وريحيني
الدموع ع الخد نشفوا
وانتي ليه بتحطي روجك
كام سؤال ف الحلق وقفوا
والقلوب غرقت في موجك
شمس بكره حالفه تشوي الفلاحين
والأماني بتستغمى م الكسوف
السنابل ع العيدان الدبلانين
طرح توهه وسكه بتوصل لخوف
ولسه صوتك في الخلا بيثير حنيني
وليه مصره ياحبيبتي تتوهيني
ردي يامه وريحيني
آجـــي يعـــني والا افـارق
قلـــبي واقـــف ع المفـارق
مسـتني تفتـح له الإشـاره
ناحـيه فيـها الظلـم سادي
وناحيه فيها الموت بينادي
وناحـيه بتــــــشد الأيـادي
والغيـــــلان عـلى ناحيـتك
واقفين حرس زي الحدادي
بانيين مابيني وبين عينيكي
الف ســد رافضـين ودادي
خايفين لاأقرب ليكي واحكي
واقولك شكوتي أو تسمعيني
ردي يامـــــــه وريحيـــــني
ردي يامـــــــه وريحيـــــني
..
بقلمي معوض حلمي الفلاح الفصيح
التعليقات مغلقة.